Бейҗиң һөкүмити хитай пуқралириға қаритилған бир пәрзәнтлик түзүмни бикар қилиши мумкин

Бу һәқтики хәвәрдә икки пәрзәнтлик сияситини синақ тәриқисидә йолға қоюш ишиниң 2011‏ - йилидин башлап иҗра қилинидиғанлиқини илгири сүргән. Бу сиясәткә асасән әгәр бала тапқучи әр - аялниң бири ялғуз пәрзәнтлик аилиниң әвлади болса, бу аилиниң 2 ‏ - пәрзәнтлик болушиға йол қоюлидикән.

Бу сиясәтниң бейҗиң, шаңхәй вә башқа 4 өлкидә 2012 ‏ - йили йолға қоюлидиғанлиқи илгири сүрүлди. Униң 2013 ‏ - вә 2014 ‏ - йиллири хитай бойичә омумйүзлүк йолға қоюлидиғанлиқи пәрәз қилинмақта.

Хитай һөкүмити 1970 ‏ - йилларниң оттурилиридин башлап пиланлиқ туғут сияситини йолға қоюп, уйғур қатарлиқ бәзи милләтләрниң шәһәр нопусидики аһалисиға 2 пәрзәнтлик, йеза напусидики аһалисиға 3 пәрзәнтлик түзүмни йүргүзгән иди.

Бу түзүм уйғурларға 1987‏ - йилдин башлап йолға қоюлған болсиму, лекин наһайити шәпқәтсиз йүргүзүлгән болуп, уйғурларниң наразилиқини қозғиған мәсилиләрниң бири болуп қалған иди. Мәзкур түзүмни тәнқид қилғучи уйғур тәшкилатлириниң әскәртишичә, даириләр мәзкур сиясәтни уйғурларниң нопусини азайтип, хитай нопусиниң райондики көп санлиқ орнини тикләйдиған вастиға айландурувалған.

Хитай даирилириниң хитай пуқралириға 2 пәрзәнтлик түзүмни йолға қойса, уйғурларға йүргүзүлгән 2 пәрзәнтлик түзүмни тәңшәйдиған яки тәңшимәйдиғанлиқи мәлум әмәс. Хитай мәтбуатлирида бу сиясәтни пиланлиқ туғут түзүми йолға қоюлған милләтләргә қандақ тәдбиқлинидиғанлиқи һәққидә һичқандақ учур бәрмигән.