Béyjing hökümiti xitay puqralirigha qaritilghan bir perzentlik tüzümni bikar qilishi mumkin

Bu heqtiki xewerde ikki perzentlik siyasitini sinaq teriqiside yolgha qoyush ishining 2011‏ - yilidin bashlap ijra qilinidighanliqini ilgiri sürgen. Bu siyasetke asasen eger bala tapquchi er - ayalning biri yalghuz perzentlik a'ilining ewladi bolsa, bu a'ilining 2 ‏ - perzentlik bolushigha yol qoyulidiken.

Bu siyasetning béyjing, shangxey we bashqa 4 ölkide 2012 ‏ - yili yolgha qoyulidighanliqi ilgiri sürüldi. Uning 2013 ‏ - we 2014 ‏ - yilliri xitay boyiche omumyüzlük yolgha qoyulidighanliqi perez qilinmaqta.

Xitay hökümiti 1970 ‏ - yillarning otturiliridin bashlap pilanliq tughut siyasitini yolgha qoyup, Uyghur qatarliq bezi milletlerning sheher nopusidiki ahalisigha 2 perzentlik, yéza napusidiki ahalisigha 3 perzentlik tüzümni yürgüzgen idi.

Bu tüzüm Uyghurlargha 1987‏ - yildin bashlap yolgha qoyulghan bolsimu, lékin nahayiti shepqetsiz yürgüzülgen bolup, Uyghurlarning naraziliqini qozghighan mesililerning biri bolup qalghan idi. Mezkur tüzümni tenqid qilghuchi Uyghur teshkilatlirining eskertishiche, da'iriler mezkur siyasetni Uyghurlarning nopusini azaytip, xitay nopusining rayondiki köp sanliq ornini tikleydighan wastigha aylanduruwalghan.

Xitay da'irilirining xitay puqralirigha 2 perzentlik tüzümni yolgha qoysa, Uyghurlargha yürgüzülgen 2 perzentlik tüzümni tengsheydighan yaki tengshimeydighanliqi melum emes. Xitay metbu'atlirida bu siyasetni pilanliq tughut tüzümi yolgha qoyulghan milletlerge qandaq tedbiqlinidighanliqi heqqide hichqandaq uchur bermigen.