Xitay da'iriliri shangxeydiki yer asti poyiz soqulush weqesini kichiklitip körsitishke urunmaqta

27-Séntebir küni shangxeyde yer asti poyizi soqulup kétip 280 din oshuq kishi yarilan'ghandin kéyin, xitaydiki uchur wasitiliride qatnash sistémisining bixeterliki heqqidiki munaziriler ulghiyip ketken.

Muxbirimiz irade
2011-09-29

Emma xitay da'irilirining weqeni bésiqturup, uni kichiklitip körsitishke urunuwatqanliqi melum bolmaqta.

Birleshme agéntliqining bayan qilishiche, 27-séntebir küni weqe yüz bergendin kéyin shangxey yer asti poyiz bashqurush da'iriliri derhal jiddiy qutquzush xizmetlirini orunlashturup, neq meydanda waqtida tedbir alghan.

Ular yene xitaydiki eng chong munazire bétide ochuq xet élan qilip, xelqtin kechürüm sorighan. Kechürüm xétide “Bu kün shangxey tömür yol qatnishi tarixidiki bir qara kün.

Biz weqe tüpeylidin ziyan'gha uchrighan xelqtin kechürüm soraymiz we bu ishning jawabkarlirini qattiq sürüshte qilimiz” déyilgen.

Emma aridin bir qanche sa'et ötmeyla, torgha qoyulghan bu ochuq xet yoqap ketkenning üstige, xitay merkizi téléwiziye istansisi xewerliride shangxeydiki poyiz soqulup kétish weqesini “Yénik derijilik poyiz soqulup kétish weqesi” dep atighan.

Xitayning weqeni yéniklitip körsitip, uni bésiqturushqa urunushi xitay tor betliride keng munazire qozghighan bolup, bu heqtiki munazirilerde “Hökümet wénjudiki weqeni jimla basturuwetken'ge oxshash, shangxeydiki weqenimu jawabsiz qaldurmaqchi boluwatidu” déyilgen.

Bu yil 7-ayda wénjuda yuqiri sür'etlik poyiz soqulup kétip, 40 kishi ölgen. Eyni waqitta xitay da'iriliri weqening tepsilatigha a'it uchurlarni qattiq qamal qilip, bu heqte sürüshte élip bérishni chekligen idi.

Da'irilerning weqening jawabkarlirini chiqirip bermesliki ziyankeshlikke uchrighuchilarning a'ile-tawabatlirini narazi qilish bilen birge, xitay emeldarlar arisidiki chiriklik mesilisini yene bir qétim su yüzige chiqarghan idi.