Qaghiliqtiki pichaq bilen hujum qilish weqeside 12 ademning ölgenliki ilgiri sürülmekte

Weqe heqqide eng deslep xitayning hökümet metbu'ati shinxu'a agéntliqi xewer bergen bolup, xitay da'iriliri uchurni qamal qilghini üchün, köpligen xelq'ara metbu'atlar öz xewerliride xitayning hökümet metbu'at xewerlirini asas qildi.

Bügünki xewerlerde, seyshenbe küni qaghiliq nahiyiside shu jay waqti chüshtin kéyin sa'et 4 lerde yüz bergen Uyghurlar bilen xitaylar otturisidiki toqunushta, 10 ademning pichaq bilen öltürülgenliki, etraptiki bir qisim ammining yarilandurulghanliqi, weqe sadir qilghuchi ikki kishining saqchilar teripidin étip öltürülgenliki, nöwette weqe sadir qilip qéchip ketkenlerni qoghlap tutush herikiti dawamlishiwatqanliqi ilgiri sürüldi.

Radi'omiz Uyghur bölümi qaghiliq nahiyisidiki saqchixanilargha téléfon qilip ehwal igileshke tirishqan bolsimu, emma da'iriler weqe heqqide melumat bérishni ret qildi. Qaghiliqtin radi'omiz ziyaritini qobul qilghan Uyghurlarning bildürüshiche, nöwette qaghiliq nahiyiside qatnash qamal qilinip, kontrolluq kücheytilgen.