“Uyghur aptonom rayoni diniy ishlar nizami” ning tüzitish kirgüzülgen nusxisida “Qanunsz diniy matériyallar” gha zerbe bérishke alaqidar madda qoshuldi

Yuqiridiki tüzitish kirgüzüsh nusxisi hazir échiliwatqan Uyghur aptonom rayonluq 11 - nöwetlik xelq qurultiyining 38 - qétimliq da'imiy hey'etler yighinida maqullashqa sunulidiken. Emma dunya Uyghur qurultiyining bayanatchisi dilshat rishit, yuqiridiki maddining Uyghur élide alliqachan yolgha qoyulup kelgenlikini eskertti. Derweqe, xoten sheherlik xelq sot mehkimisi bu yil 6 - ayda hebibulla ibrahim isimlik bir Uyghur diniy mezmunlardiki kitab tijariti bilen shughullan'ghanliqi üchün “Qanunsiz diniy matériyal tarqitish tijariti bilen shughullinip, bazar tertipini buzush” dégen jinayet bilen 10 yilliq qamaq jazasigha höküm qilghan idi.

Dilshat rishit ependi sözide, xitay hökümiti Uyghurlarning diniy we milliy xasliq teshebbuslirini Uyghur élide menggülük eminlikni ornitishqa tehdit peyda qiliwatqan amillar dep qarighanliqtin, bu xildiki teshebbuslargha “Qanunsiz diniy pa'aliyet, diniy esebiylik” dégen namlar bilen zerbe bérip kelmekte, dep eskertti.