ب ب س نىڭ خەۋەر قىلىشىچە، خىتايدىن كېلىدىغان كۆكتاتلار باھاسى ھەددىدىن زىيادە ئەرزان بولغانلىقتىن ياۋروپا بازىرىنى ئىگىلەپ كېتىپ، ياۋروپادىكى يەرلىك كۆكتاتچىلار قاتتىق زىيانغا ئۇچرىغان. بۇنىڭ بىلەن 2001-يىلى ياۋروپا ئىتتىپاقى چەتئەلدىن ئىمپورت قىلىنىدىغان سامساقتىن 9.6 پىرسەنت تاموژنا بېجى ئېلىش ئارقىلىق يەرلىك كۆكتاتچىلارنىڭ مەنپەئىتىنى قوغدىماقچى بولغان.
ئەمما بۇ خىل تەدبىرنىڭ يولغا قويۇلۇشى سامساق ئەتكەسچىلىك ۋەقەلىرىنى كۆپەيتىۋەتكەن بولۇپ، 2012-يىلى ئەنگلىيە، ئىرېلاندىيە، ئاۋسترىيە قاتارلىق دۆلەتلەرنىڭ ساقچى دائىرىلىرى قولغا چۈشۈرگەن سامساقنىڭ قىممىتى 300 مىڭ ياۋرودىن ئاشىدىكەن.
شۋېتسىيە دائىرىلىرى تۇتۇش بۇيرۇقى چىقىرىلغان بۇ ئىككى ئەنگلىيىلىك سامساق ئەتكەسچىسىنىڭ ئىسمىنى ئاشكارىلىمىغان. لېكىن ئۇلارنىڭ ئېيتىشىچە، بۇ ئىككىيلەن 2009-يىلىدىن ئېتىبارەن يالغان ئىمپورت-ئېكسپورت شىركىتى قۇرۇش ئارقىلىق، خىتايدىن ئوغرىلىقچە سامساق يۆتكىگەن.