Xitaydin yawropa ellirige qanunsiz yollardin samsaq kirgüzgen ikki kishi üstidin tutush buyruqi chiqirildi

Shwétsiye da'iriliri bügün yawropa elliride xitaydin kirgüzülgen samsaq etkeschiliki bilen shughullan'ghan ikki neper en'gliye puqrasi üstidin xelq'araliq tutush buyruqi élan qildi. Shwétsiye da'irilirining éytishiche, ular shwétsiye arqiliq yawropaning herqaysi ellirige etkes qilghan samsaqlarning qimmiti 10 milyon yawrogha yétidiken.
Muxbirimiz irade
2013.01.10

B b s ning xewer qilishiche, xitaydin kélidighan köktatlar bahasi heddidin ziyade erzan bolghanliqtin yawropa bazirini igilep kétip, yawropadiki yerlik köktatchilar qattiq ziyan'gha uchrighan. Buning bilen 2001-yili yawropa ittipaqi chet'eldin import qilinidighan samsaqtin 9.6 Pirsent tamozhna béji élish arqiliq yerlik köktatchilarning menpe'itini qoghdimaqchi bolghan.

Emma bu xil tedbirning yolgha qoyulushi samsaq etkeschilik weqelirini köpeytiwetken bolup, 2012-yili en'gliye, irélandiye, awstriye qatarliq döletlerning saqchi da'iriliri qolgha chüshürgen samsaqning qimmiti 300 ming yawrodin ashidiken.

Shwétsiye da'iriliri tutush buyruqi chiqirilghan bu ikki en'gliyilik samsaq etkeschisining ismini ashkarilimighan. Lékin ularning éytishiche, bu ikkiylen 2009-yilidin étibaren yalghan import-éksport shirkiti qurush arqiliq, xitaydin oghriliqche samsaq yötkigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.