Қарамайда уйғур, қазақ вә туңган ата-анилар наразилиқ намайиши өткүзди

12-Декабир күни қарамай шәһиридә намайиш йүз бәргәнлики хәвәр қилинмақта. Уйғур биз ториниң қарамайлиқ бир тордашниң интернетқа йоллиған учуриға асаслинип хәвәр қилишичә, чаршәнбә күни әтигән саәт 9 әтрапида қарамайдики көплигән ата-анилар балилириниң ишсизлиқидин шикайәт қилип намайиш уюштурған.
Мухбиримиз ирадә
2012.12.13

Улар намайишни шәһәрлик нефит ширкити дәрвазиси алдида қилған болуп, мәзкур тордаш интернетқа йоллиған учурида, намайишчиларниң пүтүнләй уйғур, қазақ вә туңган ата-анилар шундақла уларниң пәрзәнтлиридин тәркиб тапқанлиқини инкас қилған. Намайишниң шу күни кәч киргичә давам қилғанлиқи хәвәр қилинмақта.

Кейинки йилларда қарамай шәһиридә сирттин кәлгән хитай көчмәнләр наһайити тез сүрәт билән көпәйгән болуп, қарамай даирилири һәтта мәктәпләрдә көчмәнләрниң балилирини оқутидиған оқутқучи йетиштүрәлмәй қалған иди.

Көзәткүчиләр, хитай көчмәнләрниң көпийиши билән райондики уйғур, қазаққа охшаш башқа милләтләрниң чәткә қеқилип, наразилиқниң күчийиватқанлиқини билдүрмәктә.

Дәрвәқә қарамай шәһириниң исми йеқинқи йиллардин буян қарамайдики мәктәпләрдә уйғур-хитай оқуғучилар арисида йүз бәргән етник тоқунуш вә таяқ йегән уйғур оқуғучиларниң ата-анилириниң намайишлири билән көпрәк тилға елинидиған болуп қалған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.