Дилшат ришит хитай даирилириниң қаримайдики милләтләр мунасивити вәзийитини йошуруватқанлиқини баян қилди

Дуня уйғур қурултийиниң баянатчиси дилшат ришит, өткән һәптә қаримайда йүз бәргән икки уйғурниң хитай пуқралири тәрипидин һуҗумға учраш вәқәси вә униңдин кейин қаримайда шәкилләнгән әнсизчилик вәзийитини ахбарат дуняисидин йошуруватқанлиқини баян қилди.
Мухбиримиз шөһрәт һошур
2011.08.19

Дилшат ришитниң билдүрүшичә, мәзкур вәқә йүз бәргәндин кейин, қаримайдики уйғурлар өз балилирини мәктәпкә йолға селишта вә ялғуз һалда йол меңишта әндишә қилишмақта; қаримайдики хитай пуқралириму уйғурларниң ентиқам елиш шәклидә һуҗум қелишидин әнсирәшмәктә.

Нөвәттә хитай даирилири вәзийәтниң техиму яманлишишиниң алдини елиш үчүн, вәқәниң ахбаратқа ашкарилинишини қаттиқ чәклимәктә. Йәнә дилшат ришитниң билдүрүшичә, мушу дүшәнбә күни вәли һүсәйин исимлик бир 29 яшлиқ ишсиз яш, икки уйғурниң һуҗумға учраш вәқәси һәққидә сөз-чөчәк тарқатқан дегән гуман билән тутқун қилинған.

Әмма бу учур, хитай даирилири яки мустәқил ахбарат орунлири тәрипидин техи испатланмди. Әмма мухбиримиз қаримай шәһиридики коинлун сақчиханисиға телефон қилғанда, бир нәпәр сақчи хадими икки уйғурниң хитайлар тәрипидин һуҗумға учраш вәқәсиниң растлиқини ашкарилиди.

Әмма у вәқәни миллий өчмәнлик вәқәси әмәс, пәқәт иҗтимаий тоқунуш дәп чүшәндүрди.

Дилшат ришитниң билдүрүшичә, хотән вә қәшқәрдә йүз бәргән йеқинқи вәқәләр сәвәблик, үрүмчи вә қаримай қатарлиқ хитайлар көп нопуслуқ шәһәрләрдә, бир қисим хитай пуқралири һәм мудапиә, һәм өч елиш мәқситидә уйғурларға қарши һәрикәт үчүн тәйярлиқ һалитидә турмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.