Dilshat rishit xitay da'irilirining qarimaydiki milletler munasiwiti weziyitini yoshuruwatqanliqini bayan qildi

Dunya Uyghur qurultiyining bayanatchisi dilshat rishit, ötken hepte qarimayda yüz bergen ikki Uyghurning xitay puqraliri teripidin hujumgha uchrash weqesi we uningdin kéyin qarimayda shekillen'gen ensizchilik weziyitini axbarat dunya'isidin yoshuruwatqanliqini bayan qildi.
Muxbirimiz shöhret hoshur
2011.08.19

Dilshat rishitning bildürüshiche, mezkur weqe yüz bergendin kéyin, qarimaydiki Uyghurlar öz balilirini mektepke yolgha sélishta we yalghuz halda yol méngishta endishe qilishmaqta؛ qarimaydiki xitay puqralirimu Uyghurlarning éntiqam élish sheklide hujum qélishidin ensireshmekte.

Nöwette xitay da'iriliri weziyetning téximu yamanlishishining aldini élish üchün, weqening axbaratqa ashkarilinishini qattiq cheklimekte. Yene dilshat rishitning bildürüshiche, mushu düshenbe küni weli hüseyin isimlik bir 29 yashliq ishsiz yash, ikki Uyghurning hujumgha uchrash weqesi heqqide söz-chöchek tarqatqan dégen guman bilen tutqun qilin'ghan.

Emma bu uchur, xitay da'iriliri yaki musteqil axbarat orunliri teripidin téxi ispatlanmdi. Emma muxbirimiz qarimay shehiridiki ko'inlun saqchixanisigha téléfon qilghanda, bir neper saqchi xadimi ikki Uyghurning xitaylar teripidin hujumgha uchrash weqesining rastliqini ashkarilidi.

Emma u weqeni milliy öchmenlik weqesi emes, peqet ijtima'iy toqunush dep chüshendürdi.

Dilshat rishitning bildürüshiche, xoten we qeshqerde yüz bergen yéqinqi weqeler seweblik, ürümchi we qarimay qatarliq xitaylar köp nopusluq sheherlerde, bir qisim xitay puqraliri hem mudapi'e, hem öch élish meqsitide Uyghurlargha qarshi heriket üchün teyyarliq halitide turmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.