Uyghur élide yene yüz künlük qattiq zerbe bérish herikiti bashlan'ghan

Shinjang xewerler torining bügünki xewiride bildürülüshiche, Uyghur élide mushu ayning 10 ‏-küni yene yüz künlük qattiq zerbe bérish herikiti bashlan'ghan. Heriketke" qebih zorawanliq jinayetlirining aldini élish we uninggha qaqshatquch zerbe bérish herikiti" dep nam bérilgen.
Muxbirimiz shöhret hoshur
2010.12.28

J x nazaritining bu heriket heqqidiki uqturushida, chong kölemlik ammiwi weqelerning aldini élishmu qattiq halda telep qilin'ghan. Gerche bu heriket heqqidiki xewer we uqturushlarning mezmunida, heriketning siyasiy heriket ikenliki ashkara tilgha élinmighan, yeni atalmish "3xil küchler" nishan qilip körsitilmigen bolsimu, heriketning ghayisining muqimliqni qoghdash we uzun muddetlik eminlik berpa qilish dep körsitilginige qarighanda, heriketning asasi zerbe nishanining yenila, Uyghur élidiki milliy, siyasiy we diniy mesililerge qarshi aktiplar we narazi bolghuchi qatlamlar ikenliki melum. Xewerde bayan qilinishiche, heriket dawamida " tasadipiy weqelerge qarita neq meydan'gha baldur bérish, kishilerning toplishishining we weqening chongiyip kétishining aldini élish" tekitlen'gen.

Dunya Uyghur qurultiyining bayanatchisi dilshat rishit bügün bu weqe heqqide radi'omizgha bayanat bérip: "dunyada kishilerning teshkilatlargha uyushush hoquqi eng eqelliy heq dep qariliwatqan bügünki künde, Uyghurlarning bir jaygha toplishishiningmu tehdit dep qarilishi we buning ashkara bayan qilinishi xitayning insan heqliri weziyitidiki éghir chüshinishnila emes, Uyghur élini idare qilish jehettiki ajizliqinimu körsitip béridu" dédi.

Yüz künlük zerbe bérish heriketliri eslide Uyghur élide wang léchü'en dewrige a'it muqimliq tedbiri bolup, hakimiyet béshigha kelgendin buyan mötidil tonda gep qilishqa tiriship kéliwatqan jang chünshyenning emdilikte muqimliq tedbirliri mesiliside wang léchü'en dewrige qaytiwatqanliqini melum bolmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.