Xitay kambodazhadin qayturup eketken 20 kishidin 7 sining ürümchi weqesige chétishliq ikenlikini ilgiri sürdi

Xitayning kündilik gézitide élan qilin'ghan bash maqalidin melum bolushiche, xitayning resmiy da'iriliri 20 neper kishining hazirghiche 7 nepirining ürümchi weqesige chétishliq ikenlikini éniqlap chiqqanliqini ilgiri sürüp, ularning choqum qanuniy jazagha tartilidighanliqini bildürgen.

Ular yene bu Uyghurlarning kambodzhagha qanunsiz kirip, hem xitayning, hem kambodzhaning qanunlirigha xilapliq qilghanliqini ilgiri sürüsh arqiliq kambodzha hökümitining qilmishini aqlighan.

Xitay hökümiti 20 neper Uyghurni kambodzha hökümiti bilen til bériktürüp xitaygha qayturup ketkendin kéyin, her ikkila dölet xelq'ara jama'etning we metbu'atlarning küchlük tenqidige uchrighan idi. Xitay kündilik géziti bügünki xewiride xelq'aradiki metbu'atlarning tenqidige jawaben xitay qanunining millet ayrimichiliqi qilmaydighan adaletlik qanunliqini ilgiri sürgen.

Emma bu 20 neper Uyghur xitaygha qayturulushtin burun, xitay hökümiti ularning jinayetchi ikenlikini éytqan bolsimu, emma ularning jinayitining zadi néme ikenlikini éniq körsitip bérelmigen idi.

Hazir xelq'aradiki insan heqliri teshkilatliri kambodzha hökümiti qilin'ghan barliq chaqiriqlargha qarimay, xitaygha qayturup bergen 20 neper Uyghurning teqdiridin qattiq endishe qilmaqta.