Б д т һәм дуня уйғур қурултийи малайшияниң уйғурларни хитайға қайтурғанлиқини әйиблиди

Бирләшкән дөләтләр тәшкилатиниң мусапирлар ишханиси сәйшәнбә күни баянат елан қилип, малайшия һөкүмитиниң 11 нәпәр уйғурни һаятий хәвпкә учраш еһтимали юқири болған хитайға қайтуруп бәргәнликидин әпсуслинидиғанлиқини билдүрди.
Мухбиримиз меһрибан
2011.08.23

Дуня уйғур қурултийи баянатчиси дилшат ришит хитайға қайтурулған һәрқандақ уйғурниң еғир қийин-қистаққа елинидиғанлиқини, һәтта һаятиниң хәвпкә учраш еһтимали барлиқини билдүрүп, малайшия һөкүмитиниң хәлқара мусапирлар қануниға хилап һалда, уйғур мусапирлирини хитайға қайтуруп бәргәнликини әйиблиди.

Малайшия даирилири 8-айниң башлирида малайшияда 16 нәпәр уйғурни тутқун қилған болуп, 18-авғуст җүмә күни улардин 11 нәпирини хитайға қайтуруп бәргән иди.

Нөвәттә малайшия даирилириниң йәнә қалған 5 нәпәр уйғурниму хитайға қайтуруп бериш еһтимали барлиқи хәлқара инсан һәқлири тәшкилатлирини әнсиритиватқан болуп, дуня уйғур қурултийи һәм хәлқара инсан һәқлири тәшкилатлири малайшия һөкүмитини қалған 5 нәпәр уйғурни хитайға қайтуруп бәрмәсликкә чақирди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.