Qazaqistanliqlar xitaygha yer ijare bérishke qarshi namayish ötküzdi

1 - Ayning 30 - küni qazaqistanning almuta shehiride qazaqistan hökümitining xitaygha keng kölemde yer ijare bérish mesilisi heqqide qarshiliq namayishi ötküzüldi.
Muxbirimiz ümidwar
2010-01-31
Élxet
Pikir
Share
Print

B b s agéntliqining bu heqtiki xewiride éytilishiche, namayishchilar qollirida "qazaqning yéri sétilmaydu" dégen lozunkilarni kötürgen bolup, texminen 1000 etrapida namayishchi almuta shehiridiki chong baghchidiki léninning heykili yénigha toplan'ghan.

Öktichi partiye rehberliri nöwet bilen sözge chiqip, qazaqistan rehberlirini xitaygha yer ijare bermeslikke chaqirghan shuningdek xitayning qazaqistan'gha tehdit peyda qiliwatqanliqini eyibligen.

Xitaygha yer ijare bérish mesilisi ötken yili 12 - ayda meydan'gha chiqqan bolup, astana rehberliri xitayning qazaqistandin bir milyon géktar yerni déhqanchiliq qilish üchün ijare bérishke telep qilghanliqini ashkarilighandin kéyin bu xewer tézdin tarqilip, jem'iyette küchlük ghulghula peyda qilghan idi.

Perghane agéntliqining yézishiche, prézidént nursultan nazarbayéw we bash ministir kerim mesümow qazaqistanning tupriqining xitaygha bérilmeydighanliqini jakarlighan bolsimu, biraq taki hazirghiche öktichiler arisida inkaslar dawamlashmaqta idi. Qazaqistan öktichilirining tenqid qilishiche, xitay nöwette, qazaqistanning néfit, tebi'iy gaz qatarliq bayliqlirigha meblegh sélip we bezi énérgiye shirketlirining pay cheklirini sétiwélip, bu jayda üstünlükke ige bolushqa bashlighan. Bu ehwal qazaqlar arisida tehdit tuyghusini ashurmaqta iken.

Ötken yili xitay - qazaqistan rehberliri, xitayning qazaqistan'gha 10 milyard dollar qerz bérip turushqa pütüshken idi.

Roytérs agéntliqining xewer qilishiche, namayishni uyushturghuchi öktichi partiye "azat"ning rehbiri bolat abilow "ular xitaydin 13 milyard qerz aldi, emdi ular bizning tupraqlirimiz bilen bu qerzni qayturmaqchi boluwatidu" dégen. Namayishchilar "qazaqistan zéminida xitayning purchaqlirigha orun yoq" dégendek sho'arlarni towlighan.

Bu qazaqlarning musteqil bolghandin kéyinki tunji qétimliq keng kölemlik xitaygha qarshi naraziliq namayishi bolup hésablinidiken. Qazaqistan saqchi da'irilirimu bu namayishqa ruxset qilghan bolup, ilgiri ular öktichilik namayishigha yol qoymighan. Buningdin ilgiri xitaygha qarshi namayishlar almutida Uyghurlar teripidin ötküzülgen bolsa, bu nöwet qazaqlar özliri meydan'gha chiqqan.

Toluq bet