يېقىندا تۈركىي دۆلەتلەر ھەمكارلىق كېڭىشى رەسمىي تۈردە بارلىق تۈركىي خەلقلەر ئۈچۈن ئورتاق ئىشلىتىدىغان يېزىق ئىجاد قىلىشنى ئوتتۇرىغا قويغان بولۇپ، بۇ پىلان قازاقىستانغا جايلاشقان تۈرك ئاكادېمىيىسى تەرىپىدىن ئەمەلگە ئاشۇرۇشقا ھەرىكەت قىلىنماقتا.
پەرغانە ئۇچۇر تورىنىڭ يېزىشىچە، بۇ ئۇچۇرنى تۈركىي دۆلەتلەر ھەمكارلىق كېڭىشىنىڭ باش سېكرىتارى خالىك ئاكىنجى مەتبۇئاتقا ئاشكارىلىغان.
ئۇ سۆزىدە بۇنىڭ قانداقتۇر، بىر تۈركىي تىلنى ۋە يېزىقنى بارلىق تۈركىي خەلقلەر ئۈچۈن ئورتاق ئىشلىتىدىغان قىلىش ئەمەسلىكى، بەلكى بارلىق تۈركىي تىللار ئاساسىدا بارلىق تۈركىي خەلقلەر بىر - بىرىنى چۈشىنىدىغان تىل - يېزىق يارىتىش ئىكەنلىكى، بۇ تىل - يېزىقنىڭ تۈركىي خەلقلەر ئارا ئالاقە تىلى بولۇش رولىنى ئوينايدىغانلىقىنى بىلدۈرگەن.
ئۇ يەنە بۇ تىل - يېزىق ئىجاد قىلىشنىڭ تۈركىيىنىڭ تەشەببۇسى ئەمەسلىكىنى ئەسكەرتكەن.
تۈرك ئاكادېمىيىسى 2010 - يىلى تۈركىي دۆلەتلەر ھەمكارلىق كېڭىشىنىڭ تەشەببۇسى بىلەن قۇرۇلغان بولۇپ، مەزكۇر كېڭەش تەركىبىگە تۈركىي دۆلەت رەھبەرلىرى كېڭىشى، تاشقى ئىشلار مىنىستىرلىرى كېڭىشى، ئاق ساقاللار كېڭىشى قاتارلىقلار كىرگەن ھەمدە 2009 - يىلى، تۈركىي دۆلەتلەرنىڭ ئەزەربەيجان يىغىنى جەريانىدا قۇرۇلغان. ھازىر بۇ تەشكىلاتقا تۈركىيە، قازاقىستان، قىرغىزىستان ۋە ئەزەربەيجان قاتناشقان بولۇپ، ئۆزبېكىستان ۋە تۇركمەنىستان ئۇنى رەت قىلغان ئىدى.
0:00 / 0:00