Қазақистан явропа бихәтәрлик вә һәмкарлиқ тәшкилатиниң рәислик вәзиписигә игә болди

Қазақистан мустәқил дөләтләр һәмдостлуқи, җүмлидин мәркизий асия дөләтлири ичидә тунҗи болуп, явропа бихәтәрлик вә һәмкарлиқ тәшкилатиниң рәислик вәзиписигә игә болған мәмликәт болуп қалди. Астана бу вәзипини тапшурувалди.
Мухбиримиз үмидвар
2010.01.01

Б б с агентлиқиниң хәвәр қилишичә, мәзкур тәшкилатниң интернет торида қазақистанниң 2010 - йилидин етибарән бу вәзипигә еришкәнлики һәмдә 14 - январ күни австрийиниң вейена шәһиридә өткүзүлидиған йиғинда қазақистанниң бу орниниң рәсмий елан қилинидиғанлиқи билдүрүлгән.

Қазақистан ташқи ишлар министири қанат саудабайев буниң қазақистанниң райондики вә хәлқарадики ролиниң ешиватқанлиқидин дерәк беридиғанлиқини илгири сүргән.

Қазақистанниң явропа бихәтәрлик вә һәмкарлиқ тәшкилатиға рәислик қилидиғанлиқи 2007 - йили елан қилинған болуп, бирақ хәлқаралиқ тәшкилатлар қазақистандики инсан һәқлири вә демократийә җәһәттики чекинишләр түпәйлидин мәзкур қарарни тәнқид қилған иди. Шуниңдин кейин қазақистан рәһбири назарбайев қазақистандики демократик тәрәққият вә кишилик һоқуқ һәмдә хәлқниң параванлиқини капаләткә игә қилидиғанлиқи һәққидә көп қетим вәдә қилған.

Һәқиқәтән, кейинки вақитларда қазақистанниң иқтисадий вә иҗтимаий һаятида мәркизий асиядики башқа җумһурийәтләргә қариғанда пәрқлиқ өзгичиликләр көрүлгәнлики билдүрүлгән иди.

Қазақистандики уйғур кишилик һоқуқ паалийәтчилириниң билдүрүшичә, уйғурлар қазақистанниң явропа бихәтәрлик вә һәмкарлиқ тәшкилатиниң рәислик вәзиписигә еришишидин үмидләрни күткән болуп, улар буни уйғурларниң демократик һәрикәтлири үчүн пайдилиқ рол ойниши мумкин дәп һесаблайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.