Qazaqistan yawropa bixeterlik we hemkarliq teshkilatining re'islik wezipisige ige boldi

B b s agéntliqining xewer qilishiche, mezkur teshkilatning intérnét torida qazaqistanning 2010 - yilidin étibaren bu wezipige érishkenliki hemde 14 - yanwar küni awstriyining wéyéna shehiride ötküzülidighan yighinda qazaqistanning bu ornining resmiy élan qilinidighanliqi bildürülgen.

Qazaqistan tashqi ishlar ministiri qanat sa'udabayéw buning qazaqistanning rayondiki we xelq'aradiki rolining éshiwatqanliqidin dérek béridighanliqini ilgiri sürgen.

Qazaqistanning yawropa bixeterlik we hemkarliq teshkilatigha re'islik qilidighanliqi 2007 - yili élan qilin'ghan bolup, biraq xelq'araliq teshkilatlar qazaqistandiki insan heqliri we démokratiye jehettiki chékinishler tüpeylidin mezkur qararni tenqid qilghan idi. Shuningdin kéyin qazaqistan rehbiri nazarbayéw qazaqistandiki démokratik tereqqiyat we kishilik hoquq hemde xelqning parawanliqini kapaletke ige qilidighanliqi heqqide köp qétim wede qilghan.

Heqiqeten, kéyinki waqitlarda qazaqistanning iqtisadiy we ijtima'iy hayatida merkiziy asiyadiki bashqa jumhuriyetlerge qarighanda perqliq özgichilikler körülgenliki bildürülgen idi.

Qazaqistandiki Uyghur kishilik hoquq pa'aliyetchilirining bildürüshiche, Uyghurlar qazaqistanning yawropa bixeterlik we hemkarliq teshkilatining re'islik wezipisige érishishidin ümidlerni kütken bolup, ular buni Uyghurlarning démokratik heriketliri üchün paydiliq rol oynishi mumkin dep hésablaydiken.