Xitay qazaqistanda xitay tili ma'aripini omumlashturmaqchi

Xitayning ottura asiyadiki tesirini ashurush pa'aliyetliri dawamida xitay tili ma'aripini qazaqistanda omumlashturushni muhakime qilish yighini ghuljida échilghan.
Muxbirimiz irade
2010.12.02

Shinxu'a torining xewer qilishiche, 2010- yilliq ottura asiya iqtisad we xitay tili medeniyiti xelq'ara ilmiy muhakime yighini namli'iq bu yighinni ili pidagogika inistituti we qazaqistan ableyxan xelq'ara munasiwetler we chet'el tili uniwérsitéti birlikte uyushturghan.

Xewerdin melum bolushiche, bu yighinning asasiy meqsiti xitayning qazaqistan we shundaqla bashqa ottura asiya elliri bilen bolghan iqtisadiy munasiwitini tereqqiy qildurush we shundaqla xitay tili ma'aripining ottura asiyada omumlashturulushi qatarliq mesililer üstide muzakire élip bérish bolghan. Yighin qatnashquchiliri qazaqistanda jümlidin ottura asiyadiki bashqa ellerde xitay tili ma'aripini ünümlük omumlashturush we bu arqiliq xitay tilining xelq'aragha yüzlinish mesilsini ünümlük hel qilishning chariliri üstide meslihetleshken.

Xitay hazir ottura asiyadiki tesir küchini ashurush üchün pa'al heriket qiliwatqan bolup, u ottura asiyada iqtisad arqiliqla emes, belki xitay tili we xitay medeniyitige da'ir teshwiqat pa'aliyetliri arqiliqmu bu ellerdiki tesir küchini ashurushqa tirishmaqta. Xitay ilgiri qazaqistanda kungzi tetqiqat merkizinimu qurghan idi, igilishimizche, bu nöwet yighinda xitay tili dersini yolgha qoyush üchün xitay qazaqistandiki 7 aliy mektep bilen hemkarlishishni qarar qilghan.

Xitay da'iriliri yene qazaqistan ableyxan uniwérsitéti bilen birliship, xitay - qazaqistan xitay tili oqutush merkizi qurghan bolup, bu merkez xitayning qazaqistan we ottura asiyada xitay tili ma'aripini tereqqiy qildurush we omumlashturushi üchün muhim bir bazisi bopqalidiken.

Xitayning yéqindin buyan qazaqistan bilen élip bériwatqan qazaqistanda iqtisadiy alahide rayon berpa qilish, boz yer échish üchün 70 ming xitay yötkeshke oxshash bir qatar tijariy alaqiliri bezi qazaqistanliq közetküchilerde endishe peyda qilmaqta. Ular ilgiri bu heqte bildürgen ipadiliride buning xitayning kéngeymichilik siyasitining bir qismi ikenlikini ilgiri sürüshken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.