Уйғур елидики бир қисим қәдимий мәдәнийәт излириға мәбләғ селинди

Уйғур аптоном районлуқ мәдәний ядикарлиқлар идариси хитай дөләтлик тәрәққият вә ислаһат комитетиниң қоллиши билән уйғур елидики алтә орундики мәшһур қәдимий мәдәнийәт излирини қоғдаш әслиһәлирини қуруш вә мәдәнийәт излири җайлашқан орунниң муһитини түзәш ишлирини башлиған болуп, мәзкур қурулуш үчүн 40 милйон йүән мәбләғ аҗритилған.
Мухбиримиз үмидвар
2011.03.27

Шинхуа агентлиқиниң бу һәқтики учуриға асасланғанда, хитай дөләтлик тәрәққият вә ислаһат комитетиниң мәбләғ билән мәзкур қурулушни қоллишидики сәвәб, хитай йипәк йолиниң уйғур елидики бөликини бирләшкән дөләтләр тәшкилатиниң дуня мәдәнийәт мираслири тизимликигә киргүзүш үчүн илтимас қилмақчи болған.

Буниң үчүн уйғур елидики даңлиқ қәдимий мәдәнийәт излиридин қизил миң өй, кроран қәдимий шәһири, туюқ ғари, су беши будда ибадәтханисиниң харабиси вә мәһмут қәшқири мәқбәриси қатарлиқларни түзәшни бекиткән.

Йипәк йоли кәң мәнидики бир қәдимий мәдәнийәт уқуми болуп, йипәк йолиниң оттура асия вә башқа җайлардики қисимлириниңму б д т ниң дуня мәдәнийәт мираслири тизимликигә илтимас қилиниш әһвалиға аит учурлар ениқ әмәс.

Чәт ‘әлдә яшаватқан, исмини ашкарилашни халимиған бир уйғур мутәхәссисиниң ейтишичә, уйғур елидики исми аталған бу қәдимий мәдәнийәт излири, болупму уйғурларниң исламийәт дәвригә мәнсуп мәдәнийәт излириниң илгири йетәрлик мәбләғ аҗритилмиғанлиқи вә яхши қоғдалмиғанлиқи һәм башқа һәр хил сәвәбләр түпәйлидин бузулуши еғиррақ болған.

Һәтта уйғурларниң оттура әсир исламийәт дәвригә мәнсуп нурғун мәдәнийәт мираслириниң йоқитилиши вә вәйран қилиниши өткән әсирниң 50-70-йиллирида әң еғир болған. Гәрчә, кейин бир қисим мираслар қоғдилип ясалған болсиму, бирақ униңда оттура түзләңлик мәдәнийитиниң тәсирини көрситиш үчүн алаһидә күч чиқирилған.

Әмма, йипәк йолиниң оттура асия қисмидики сәмәрқәнт, бухара, хивә вә башқа җайларда болса, кона шәһәрләр, мәсчитләр, мәдрисәләр яхши сақлинипла қалмастин бәлки ремонт қилинип, әсли қияпити бойичә әслигә кәлтүрүлүп, бүгүнки күндә дуняниң мәшһур зиярәтгаһлири қатаридин орун алған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.