Шинхуа агентлиқи қәшқәрдә йүз бәргән вәқә һәққидә тәпсилати йоқ учур тарқатти

Кәч саәт 6 дики хәвиридә, қәшқәрдики йемәк базирида, 12 лүкчәк җинайәт садир қилип, 10 адәмни чанап өлтүрди вә яриландурди, буниң ичидә сақчиму бар. Вәқә йүз бәргән һаман сақчилар уларға қарши оқ чиқарди, уларниң 4 ни нәқ мәйданда етип өлтүрди, 4 ни қолға тутувалди, йәнә 4 и қечип кәтти, дәп баян қилди.

Шинхуа агентлиқи кәч саәт 8 дики хәвиридә, икки нәпәр җинайәтчи қәшқәрдики йемәк базириға баридиған йолда, қизил чирақта сақлап турған бир аптомобилини булап, адәм топиға қарап һәйдәп маңған, аптомобилдин чүшүпла адәм чанашқа башлиған. 6 Адәмни өлтүргән, 28 адәмни яриландурған. Бу базардики хәлқ бирлишип һәрикәт қилип, уларниң бирини өлтүргән, бирини тутувалған, дәп баян қилди.

Ройтрс, фирансийә, бирләшмә агентлиқ қатарлиқ башқа учур васитилири бүгүн қәшқәрдин учур бериш имканийигә игә болмиғанлиқтин, улар пәқәт шинхуа агентлиқиниң ениқсиз мәлуматлиридинла нәқил елип хәвәр берип, хитайни вәқәниң тәпсилатини йошурди дәп әйиблиди.

Қәшқәр вилайәтлик биринчи дохтурхана хадиминиң мухбиримизға ейтип беришичә, сақчилар бу дохтурханиға 30‏- 40 яш чамисидики 4 нәпәр хитай яридарни елип кәлгән, улар баш, көкрәк, пут-қоллири кесилип қанап кәткән еғиррақ яридарлар икән.

Буларни давалиғанда,сақчилар кечичә бу дохтурханиниң җиддий қутқузуш бөлүмидә докторларни назарәт қилип турған. Бу районда бу давалиғучи хадимлар, бүгүн қәшқәрдә интернет торлири етиветилгәчкә, зади немә вәқә йүз бәргәнликиниму уқалмиған.

Үрүмчидики шинҗаң гезити бүгүн қәшқәрдә йүз бәргән бу вәқәни хәвәр қилмай, пәқәт җаң чүншәнниң шинҗаң һәрбий районниң биринчи сиясий комиссари болуп һәрбий һоқуқниму қолиға алғанлиқини тәбрикләп хәвәр елан қилди.