Қәшқәрдә көк кийимлик йолучи кийиминиң рәңги түпәйли сораққа тартилған

Уйғур илидики тор бекәтлириниң җүмә күни хәвәр қилишичә, уйғур елиниң мәркизи үрүмчидин қәшқәргә зиярәткә барған путбол мәстанилар оюшмиси "һурра " кулубиниң көк рәңлик майкисини кийгән бир кулуб әзаси, қәшқәрдә майкисиниң рәңги түпәйли сақчилар тәрипидин сораққа тартилған.
Мухбиримиз әркин
2008-10-24
Share

Вәқә 19 ‏ - өктәбир күни һейткар мәйданида йүз бәргән болуп, һейткар мәйданидики икки уйғур сақчи "һурра"кулубиниң көк рәңлик майкисини кийивалған кулуб әзасини һейткар мәйданида тосувелип, "кийимиңиздики көк рәң немини ипадиләйду ? кийимиңизгә 'һурра шинҗаң' дәп йезивелип немә мәқсәткә йәтмәкчи," дегән соалларни сориған.

Йолучи сақчиға бирәр саәттәк чүшәндүрүш бәргән болсиму, лекин уларға гәп аңлиталмай ахири сақчиларниң хитай башлиқи билән параңлашқан вә аваричилиқтин аран қутулған.

Көзәткүчиләр көк рәңниң сақчиларни биарам қилишидики сәвәб шәрқий түркистан байриқиниң көк рәңлик икәнликидә болса керәк, дәп қаримақта. Лекин йәнә бәзи җәмийәтшунаслар, қәшқәр даирилириниң бу һәрикити қәшқәрдә йүз бәргән олимпик мәзгилидики вәқәләрниң даириләрдә пәйда қилған сәзгүрлүк кесили, дәп көрсәтмәктә.

Олимпик һарписида 2 уйғур яш қәшқәрдики хитай чегра мудапиә қисимлириниң әтигәнлик йүгрәшкә чиққан әскәрлиригә һуҗум қилип, 16 әскәрни өлтүргән. Лекин 4 ‏ - авғусттики бу вәқәни өз көзи билән көргән чәтәлликләр болса тоқунушниң сақчи кийимлик кишиләр арисида йүз бәргәнликини илгири сүргән иди.

Америкидики хитай әлчиханисиниң әмәлдари ваң бавдуң америка мәмликәтлик аммиви радиосиниң уйғурлар һәққидики йеқинқи бир программисида вәқәниң сақчилар арисидики тоқунуш икәнликини рәт қилип, вәқә пәйда қилған 2 кишиниң бириниң сақчи кийими кийивалғанлиқини илгири сүргән. Хитай һөкүмити 4 ‏ - авғусттики бу вәқәни баһанә қилип, қәшқәрдә алаһидә җиддий бихәтәрлик тәдбирлирини йолға қоймақта иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт