Қәшқәр кона шәһәр районидики өйләрни мәҗбури чеқиш давамлашмақта
Мухбиримиз миһрибан
2009.05.21
2009.05.21
Хитай һөкүмитиниң қәшқәр шәһиригә хитай мәркизи ахбарат агентлиқиниң мухбирини әвәтиши һәргизму тасадипий әһвал әмәс, чүнки бу йилниң бешида, хитайниң уйғур аптоном районидики һөкүмәт даирилириниң уйғур милли мәдәнийитиниң қәдими бөшүклиридин бири болған, қәшқәр шәһриниң кона шәһәр районидики, уйғурлар зич топлишип олтурақлашқан мәһәллиләрдики, уйғур милли бинакарлиқ услуби гәвдиләндүрүлгән, уйғур әнәниви өрп - адәт вә мәдәнийәт пуриқи қоюқ болған, уйғур мәһәллирини чақмақчи болғанлиқи һәққидики хәвәр тарқилиши биләнла, бу иш уйғур хәлқиниң қаттиқ наразилиқини һәмдә хәлқара көзәткүчиләрниң диққитини қозғиған.
Уйғур зиялийлири тор бәтлиридә мақалә елан қилип, хитайниң уйғур елидики һөкүмәт даирилириниң қәшқәрдики бу қәдими мәдәнийәт изини йоқатмақчи болғанлиқини тәнқидлигән иди. Хитайниң уйғур елидики һөкүмәт даирилири қәшқәрдики йәрлик уйғурларниңму наразилиқлири һәм қаршилиқлириға учриған иди.
Бу йил 3 - ай мәзгиллиридә уйғур аптоном районлуқ хитай һөкүмәт даирилириниң қәшқәр шәһрини тәрәққий қилдуруш намида қәшқәр шәһиридики бу қәдимий шәһәр райониға җайлашқан туралғу ларни чеқиш һәрикити хәлқарадиму күчлүк қаршилиқ инкаслирини қозғиған болуп, америкида чиқидиған "вашингтон почтиси" гезитидә мәзкур гезитниң бейҗиңдики ишханисиниң мудири моуррин фаңниң "бир қәдимий мәдәнийәт йәр билән йәксан қилинмақта" мавзулуқ мақалиси елан қилинған иди.