'Манас' дастаниниң б д т тәрипидин ғәйри мадди мәдәнийәт мираслири тизимликигә киргүзүлиши қирғизистанда ғулғула қозғиди

Қирғиз хәлқиниң мәшһур қәһриманлиқ дастани " манас" йеқинда хитай һөкүмитиниң илтимаси билән бирләшкән дөләтләр тәшкилати, пән - маарип вә мәдәнийәт оргини тәрипидин инсанийәтниң "ағзаки,ғәйри мадди мәдәнийәт мираслири" тизимликигә киргүзүлиши шәрипигә еришкән болуп, бу уйғур 12 муқаминиң мәзкур шәрәплик намға еришишидин кейинки йәнә бир зор вәқә иди.
Мухбиримиз үмидвар
2009.10.25

Бирақ, "манас" дастаниниң мәзкур салаһийәткә еришиши қирғизистанда бир мәйдан ғулғулиларға сәвәб болған болуп, буниңға сәвәб болған амил мәзкур дастанниң қирғизистан тәрипидин әмәс бәлки хитай тәрипидин б д т ға сунулуп, мәзкур салаһийәткә еришишидур.

Бир қисим қирғиз зиялийлири манас дастанини бу тизимликкә киргүзүшкә қирғизистанниң игә болуши лазимлиқини оттуриға қойған.

Қирғизистанниң "24 саәт" учур агентлиқиниң хәвәр қилишичә, " айтиш" дәп аталған аммиви фондиниң қурғучиси садиқ ширнияз мухбирларни күтүвелиш йиғини ечип, қирғизистан президенти, юқири кеңиши вә һөкүмитигә мураҗәт қилип, "қирғизларниң манас дастани б д т, пән - маарип вә мәдәнийәт оргининиң ғәйри мадди мәдәнийәт мираслири тизимликигә хитай тәрипидин киргүзүлмәслики керәк," дәп җакарлиған һәмдә қирғизистан һөкүмитини бу байлиққа игә болушқа чақирған.

Униң илгири сүрүшичә, хитай икки йилидин буян манас дастанини бу тизимликкә киргүзүш үчүн илтимас сунған болса, қирғизистан тәрәп 2000 - йилидин етибарән илтимас сунушни давамлаштурған болсиму, бирақ б д т ниң мәзкур оргини пәқәт бу дастан һазирму даңлиқ дәп җаваб бәргән, әмма хитайниң илтимасини тәстиқлиған.
 
Манас дастаниниң қирғизистан тәрипидин әмәс, бәлки хитайниң илтимаси бойичә инсанийәтниң ағзаки, ғәйри мадди мәдәнийәт мираслири тизимликигә киргүзүлишидин келип чиққан түрлүк инкаслар қирғизистанниң "24 саәт", "акипрәсс" қатарлиқ түрлүк агентлиқлириниң тор бәтлиридә елан қилнған иди.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.