Қирғизистан өз пайтәхтиниң намини өзгәртиши мумкин

Қирғизистанниң 24.Кг агентлиқиниң йезишичә, йеқинда қирғизистан президентиниң сияси ишлар мәслиһәтчиси топчибәк турғаналийев қирғизистан пайтәхти бишкәкни манасқа өзгәртиш идийисини оттуриға чиқарғандин кейин, бу мәсилә бойичә қирғизистанда бәс-муназирә қозғалған.
Мухбиримиз умидвар
2010.11.28
Share on WhatsApp
Share on WhatsApp

24-Кг агентлиқи тәрипидин елан қилинған " қирғизистан пайтәхти бишкәкни манасқа өзгәртишкә қандақ қарайсиз? " мавзулуқ мақалидә бир қисим сиясийон вә алимлар өзлириниң қарашлирини оттуриға қойған болуп, мақалидә ейтилишичә, 1991-йили қирғизистан мустәқил болғандин кейин әслидә фрунзе дәп атилип кәлгән бу шәһәр намини өзгәртиш һәққидә бәс-муназирә болғанда, бәзиләр уни "манас"қа өзгәртишни оттуриға қойған. Лекин, ахири бишкәк аталғуси қоллинилған.

Бишкәк әслидә таки 30-йилларғичә пишпек дәп аталған болуп, кейин 1920-йиллирида оттура асиядики мустәқиллиқ һәрикитини бастурған совет қизил армийә генерали фрунзиниң нами бу шәһәргә берилгән.

Топчибәк турғуналийевниң қаришичә, манас дастани қирғиз хәлқи үчүн бүйүк әһмийәтлик. Дунядики көплигән дөләтләрдә мәшһур қәһриманларниң исми шәһәрләргә қоюлиду, бу символлуқ характериға игә.

 Мәзкур мақалидә пикир баян қилғучиларниң көпинчиси бишкәкниң намини өзгәртишкә қарши чиққан. Қарши чиққучилар ичидә қирғизлар вә русларму бар, уларниң сөз орамиға қариғанда, һазир қирғизистанниң қилидиған иши шәһәр намини өзгәртиш әмәс, хәлқниң турмушини яхшилаш, иқтисадни көтүрүштин ибарәт. Бишкәктә яшайдиған атақлиқ рус сиясәтшунас андрей киниязев мундақ дегән: "мән шәһәр намини өзгәртишкә қәтий қарши, мән фрунзида туғулдум, бишкәктә чоң болдум, мана әмди манаста һаятимни ахирлаштурушни халимаймән. Бу шәһәр әсли өзиниң тарихи исми болған пишпек дәп атилиши керәк."

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.