Qirghizistan öz paytextining namini özgertishi mumkin

24-Kg agéntliqi teripidin élan qilin'ghan " qirghizistan paytexti bishkekni manasqa özgertishke qandaq qaraysiz? " mawzuluq maqalide bir qisim siyasiyon we alimlar özlirining qarashlirini otturigha qoyghan bolup, maqalide éytilishiche, 1991-yili qirghizistan musteqil bolghandin kéyin eslide frunzé dep atilip kelgen bu sheher namini özgertish heqqide bes-munazire bolghanda, beziler uni "manas"qa özgertishni otturigha qoyghan. Lékin, axiri bishkek atalghusi qollinilghan.

Bishkek eslide taki 30-yillarghiche pishpék dep atalghan bolup, kéyin 1920-yillirida ottura asiyadiki musteqilliq herikitini basturghan sowét qizil armiye générali frunzining nami bu sheherge bérilgen.

Topchibek turghunaliyéwning qarishiche, manas dastani qirghiz xelqi üchün büyük ehmiyetlik. Dunyadiki köpligen döletlerde meshhur qehrimanlarning ismi sheherlerge qoyulidu, bu simwolluq xaraktérigha ige.

 Mezkur maqalide pikir bayan qilghuchilarning köpinchisi bishkekning namini özgertishke qarshi chiqqan. Qarshi chiqquchilar ichide qirghizlar we ruslarmu bar, ularning söz oramigha qarighanda, hazir qirghizistanning qilidighan ishi sheher namini özgertish emes, xelqning turmushini yaxshilash, iqtisadni kötürüshtin ibaret. Bishkekte yashaydighan ataqliq rus siyasetshunas andréy kiniyazéw mundaq dégen: "men sheher namini özgertishke qet'iy qarshi, men frunzida tughuldum, bishkekte chong boldum, mana emdi manasta hayatimni axirlashturushni xalimaymen. Bu sheher esli özining tarixi ismi bolghan pishpék dep atilishi kérek."