Qirghizistanda özbék tilida aliy mektepke kirish imtihani élinmaydu

Perghane uchur torining xewer qilishiche, qirghizistan jumhuriyitide 2013 - yilidin tartip aliy mekteplerge kirish imtihanlirini peqet dölet tili we resmiy til bolghan qirghiz hem rus tilidila bérish békitildi.
Muxbirimiz ümidwar
2013.02.03


“Jumhuriyetlik omumiy imtihani” dep atalghan mezkur imtihan türi ilgiri jumhuriyettiki asasliq milletlerning biri hésablan'ghan özbéklerning tilidimu bérishke ruxset qilin'ghan bolsa, bu yildin étibaren emeldin qaldurulghan.

Qirghizistan ma'arip ministirliki buning sewebi süpitide imtihan béridighan özbék oqughuchilarning sanining yildin yilgha azlawatqanliqi, uning üstige yene qirghizistan aliy mektepliride peqet rusche we qirghizche ikki tilda ders ötilidighanliqini körsetken.

Hazir qirghizistanda 256 özbék tilida ders ötilidighan mektep bar bolup, buning beziliri arilash mektepler iken. Bu mekteplerde 100 mingdin artuq bala oqumaqta iken.

Qirghizstanning jenubi wilayetliride özbékler bir qeder zich we köp olturaqlashqan bolup, 2010 - yili, osh we jalal - abad sheherliride özbékler bilen qirghizlar arisida étnik toqunush kélip chiqip, her ikki xelqtin köp sanda adem hayatidin ayrilghan idi. Osh we jalal - abad wilayetliride özbéklerning öz tili we milliy kimlikini qoghdash idiyilirining küchlük ikenliki melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.