Қизилсуда буниңдин 1300 бурунқи қәбристанлиқ тепилди
2013.02.01
Шинхуа агентлиқиниң хәвиридә илгири сүрүшичә, 1 миң 500 квадрат метир көләмдики қәбристанлиқтин 102 қәбрә тепилған болуп, қәбриләрниң 40 пирсәнти кичик балиларниң икән.
Хәвәрдә қәбристанлиқниң қизилсуда байқалғанлиқи қәйт қилинған болсиму, бирақ конкрет қайси җайдин тепилғанлиқи тилға елинмиған. Қезишқа қатнашқан археологларниң билдүрүшичә, яғач тавут ичидики җәсәтләр қуруп кәткән. Таш әсваблар, сапал қача вә мис әсваблар җәсәтләргә қошуп дәпинә қилинған.
Бунчилик көп кичик бала җәситиниң тепилиши археологларни һәйран қалдурған. Археологларниң билдүрүшичә, бу җәсәтләр мәнсуп қәбилидин немишқа бунчилик көп кичик бала өлүп кәткәнликини илгириләп тәкшүрүшкә тоғра келидикән.
Хитай ахбарат васитилириниң хәвәрлиридә, қәбристанлиқтики җәсәтләрниң қайси таипигә мәнсуп кишиләр икәнлики чүшәндүрүлмигән. Бирақ уйғур аптоном районлуқ археологийә тәтқиқат орниниң башлиқи йү җийоңниң сөзини нәқил кәлтүрүп, “қәбридин чиққан тавутларға қариғанда буниңдин 1 миң 300 йил йил бурун хәнзу мәдәнийитиниң йәрлик хәлқләргә чоңқур тәсир қилғанлиқи көрүнүп туриду” дегән.
Қәбриләрдин йәнә, наһайити нурғун қапақтин ясалған вә яхши сақланған турмуш буюмлири тепилған.
Чәтәлдики бәзи уйғур тәтқиқатчилар йү җийоңниң сөзини тәнқид қилип, буниңдин 1 миң 300 йил йил аввал бу районға түркий қәбилиләр һөкүмранлиқ қилғанлиқи вә қапақтин турмуш буюмлирини ясаш уйғурларға хас бир хил мәдәнийәт тикәнликини билдүрди.
Уларниң илгири сүрүшичә, бу райондин тепилған һәр қандақ мәдәний ядикарлиқтин хитай мәдәнийитиниң изналирини тепишқа урунуш илмий археологийилик метод әмәс.