Xitay qirghizistan'gha 2 milyard dollar meblegh salmaqchi

Perghane uchur torining xitayning “Xelq géziti” din neqil keltürüp tarqatqan uchurida éytilishiche, bu uchurni qirghizistanning birinchi mu'awin bash ministiri ömurbék babanofmu ashkarilighan bolup, u 1-iyun küni xitayning “Sinogidro” shirkitining wekilliri bilen sözleshkende xitay terepning qirghizistanning susamir we kokoméren deryalirida ulanma su éléktr istansiliri qurushqa pütüshken.

Pütüshüm boyiche birlikte pilanlar tüzülüp, 2011-yilining axiridin étibaren qurulush bashlinidiken. Eslide babanof bilen xitay terep bu yil aprél éyida babanof béyjingni ziyaret qilghanda bu kélishim heqqide sözliship, pikir birliki hasil qilip bolghan idi.

Kéyinki waqitlarda qirghizistanning énérgiye mesilisi jiddiyliship qalghan bolup, qirghizistan özbékistandin alidighan tebi'iy gazning heqqini töliyelmeydighan ehwal körülgen, éléktr énérgiyisini ishlitishtimu yétishmeslik körülüp, ahalilerning hayatigha bésim peyda qilghan idi.

Qirghizistan yéngi hökümiti qirghizistan su menbesining yaxshi bolushtek ewzellikidin paydilinip, su éléktr istansilirini qurush arqiliq énérgiye mesililiridiki qiyinchiliqlarni shuningdek yene éléktr énérgiyisi éksporti arqiliq döletning iqtisadini yaxshilashqa kirishken.