Қирғизистанда хитай ишчилар билән қирғизлар арисида кәң көләмлик тоқунуш йүз бәрди

Б б с хәвәр қанилиниң бүгүн хәвәр қилишичә, қирғизистандики хитай мәбләғ салған алтун кени болған татбулақ алтун канида ишләйдиған хитай ишчилар мәшғулат қиливатқанда, шу йәрдә кетиватқан бир атлиқ қирғизға топа қезиш машиниси билән үсүп, униң етини бесип өлтүрүп қойған. Бу иш йәрлик қирғизларниң наразилиқини қозғиған. Нәтиҗидә 21-өктәбир күни кан әтрапидики йеза аһалилири хитай ишчилар билән тоқунушқан. Тоқунушта йәрликләрдин 4 киши бешидин ярилинип, дохтурханиға апирилған.

Әтиси, шу йезидики 450 тәк қирғиз аһалиси намайиш қилип, қирғиз һөкүмитидин хитай ишчиларни қоғлап чиқирип, алтун канларға йәрликләрдин ишчи қобул қилишни тәләп қилған. Қирғиз даирилири нөвәттә йеза әтрапидики бихәтәрлик тәдбирлирини күчәйткән вә 300 әтрапидики хитай ишчини башқа йезиларға йөткигән.

Хитайниң йәршари вақит гезити вәзийәтниң контрол астиға елинғанлиқини тилға алған болсиму, қирғиз даирилири алтун каниниң бу тоқунуш сәвәбидин һазирчә иш башлиялмайдиғанлиқини билдүргән.