Uyghur rayonluq hökümet qosh til ma'aripi yirik pilanini élan qildi

Bu yirik pilan Uyghur rayonining kelgüsi 10 yildiki qosh tilliq islahatigha yétekchilik qilidighan heriket qélibnamisi hésablinidiken.

Uyghur rayon da'iriliri pilan'gha asasen 2012-yilighiche mektep yéshigha toshmighan balilar ma'aripini xitaychilashturushni omumlashturup bolush, 2015-yilighiche ottura-bashlan'ghuch mekteplerni, 2020-yilighiche bolsa barliq yesli, ottura, bashlan'ghuch mekteplerde xitay tili oqutushini omumlashturushni 100 pirsentke yetküzüshni pilan qilmaqta.

Xitay da'iriliri yürgüzüwatqan qosh til ma'aripi siyasiti chet'ellerdiki Uyghur ziyaliylirining birdek naraziliqini qozghawatqan bir mesile. Ular atalmish “Qosh tilliq” oqutushining xitay tilini asas qilghan yekke til ma'aripi ikenlikini ilgiri sürmekte.

Yéqinda amérika dölet ishliri ministirliqi teripidin élan qilin'ghan yilliq kishilik hoquq doklatida Uyghur rayonida yürgüzülüwatqan qosh til ma'aripi siyasiti alahide yer alghan we xitay hökümitining bu arqiliq Uyghurlarning milliy kimlikini suslashturuwatqanliqi bildürülgen idi.

Xitay merkizi hökümiti bu pilan'gha mexsus meblegh ajratqan bolup, buni rayonni muqimliqqa érishtürüshtiki muhim bir basquch dep qarimaqta.

Derweqe, xelq gézitide bu heqte bérilgen xewerdimu qosh til ma'aripi yirik pilani Uyghur rayonida “Halqima tereqqiyat” we “Menggülük eminlik”tin ibaret ikki chong istratégiyilik wezipini orundashqa zor tesir körsitidu, déyilgen.