Qosh til ma'aripi Uyghurlar zich olturaqlashqan nahiye-bazarlarda jiddiy qaralmaqta

Junggo ma'arip tor bétide élan qilin'ghan xewerdin melum bolushiche, Uyghur nopusi eng zich bolghan nahiyilerdin yeken nahiyiside qosh til yesliliride oquydighan balilarning sani 21 ming 447 neperge yétip, omumlishish nisbitini 83 pirsenttin ashqan. Nahiyidiki 128 ottura, bashlan'ghuch mektepte 663 qosh til sinipi échilip, terbiyiliniwatqan oqughuchi sani 25076 neperge yetken.

Xewerlerdin, yerlik da'irilerning Uyghur balilirigha qosh til mekteplirining oqutush sewiyisi yuqiri, oqutquchiliri xil, oqughuchilarning aliy mektepke ötüsh nisbiti yuqiri dep teshwiq qilish arqiliq, ularni xitay tilida oqushqa qiziqturuwatqanliqi melum bolmaqta. Emma chet'ellerdiki Uyghur ziyaliyliri xitay hökümitining bu taktikisidin narazi. Ular, Uyghur tili bilenmu ilghar pen-téxnikilarni ögen'gili bolidighanliqini bildürüp, xitay hökümitini semimiy bolushqa we Uyghur ma'aripini yoqitishqa urunmasliqqa chaqirmaqta.

Xitay hökümiti Uyghurlarning naraziliqigha qarimay 2012-yilliq ma'arip xizmetliri yighinida 2015-yilighiche qosh tilliq ottura, bashlan'ghuch mektep nisbitini 75 pirsentke yetküzüsh pilanini orundash üchün qosh til ma'aripi xizmitini eng muhim wezipiler qatarigha kirgüzdi.