Қурбан һейтқа тәйярлиқ қилинмақта

Мусулманларниң әң чоң һейтлиридин бири болған қурбан һейти йеқинлишип қалмақта. Қурбан һейт намизиниң 11 - айниң 15 - яки 16 - чесласиниң қайсисида оқулуш мәсилисидә дуняниң һәр қайси җайлиридики мусулманлар арисида қисмән охшимиған пәрәзләр бар иди.
Мухбиримиз үмүдвар
2010-11-07
Share

Сәуди әрәбистан һөкүмити бу йилқи қурбан һейт намизиниң 16 - ноябир күни оқулидиғанлиқини елан қилған. Бу һәқтә хитайниң шинхуа агентлиқиму учур тарқитип, хитай тәвәсидики мусулманларға намаз күни һәққидә бишарәт бәргән.

Америка пайтәхти вашингтон шәһири йенидики түрк җамаитиниң мәсчитидиму, өткән җүмә күни, қурбан һейт намизиниң америкида 16 - ноябир күни оқулидиғанлиқи елан қилинип, барлиқ түрк, уйғур вә башқа мусулман җамаәтлири бирликтә намаз оқушқа чақирилған.

Фәирфәкис шәһири вә униң әтрапидики уйғурларниң көп қисими бир қанчә йилдин буян түркләр билән бирликтә һейт намизи оқуп, һейтни тәбриклимәктә.  Фәирфәкис шәһиридә яшайдиған бир мойсипитниң ейтишичә, бундақ болушидики сәвәбтә түркләр билән уйғурларниң қериндашлиқи, тил вә тарихи ортақлиқи һәм йеқинлиқи муһим рол ойниған. У өзиниң түрк имамниң һәммә сөзлирини асасән чүшинидиғанлиқини билдүрди. Униң үстигә йәнә, өткән йилидики үрүмчи вәқәсидин кейин, түркийә һөкүмити вә хәлқиниң уйғурларға болған һесдашлиқи, уйғурларниң түркләр билән болған мунасивәтлирини техиму қоюқлаштурған.

Бу йилқи һәҗ паалийитиму башлиниш алдида турмақта. Һазир дуняниң һәр қайси җайлиридин кәлгән икки милйондин артуқ мусулманниң мәккә вә мәдинигә җәм болғанлиқи хәвәр қилинмақта. Әмма, хитай һөкүмитиниң бу йил уйғур елидин зади қанчилик уйғур мусулманниң һәҗ қилишиға рухсәт қилғанлиқи ениқ әмәс. Бир диний зат паспорт елиш қийинчилиқи түпәйлидин көплигән уйғурларниң шәхсий йоллар билән һәҗ паалийити қилишиниң тосқунлуққа учраватқанлиқини инкас қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт