Қутуби 2-оттура мәктипидә хитай оғул оқуғучилар икки уйғур қиз оқуғучини синипқа қамивелип урди

Мухбиримизниң йәрлик аһалиләрдин игилишичә, вәқә икки уйғур қиз оқуғучи билән хитай қиз оқуғучилар арисида йүз бәргән гәп талишиштин башланған. Қиз оқуғучиларниң гәп талишишиға арилашқан хитай оғул оқуғучилар икки уйғур қизни синипқа тартип әкирип, уларға топлишип һуҗум қилған. Һуҗумда хитай оқуғучилар сүпүргә, тоқмақ вә орундуқларниму қолланған.

Вәқәгә арилашқан оқутқучилар хитай оқуғучиларни синиптин чиқиривәткән болсиму, хитай оқуғучилар синипқа бөсүп кириш үчүн, тәкрар-тәкрар урунған.

Мәлум болушичә, мәктәп рәһбәрлири вәқәни йәң ичидә бир тәрәп қилиш йолини тутуп, вәқәниң ахбарат васитилиригә тарқилишини тосқан, вәқә садир қилған хитай оқуғучиларға һечқандақ җаза қолланмиған.

Бу уйғур елидә йеқинқи бир йил ичидә оқуғучилар арисида йүз бәргән миллий тоқунуш һәрикәтлириниң 3-қетим ахбаратқа ашкарилинишидур.

Өткән йили қарамай иккинчи оттура мәктәптә, бу йилниң бешида болса үрүмчи 20-оттура мәктәптә уйғур оқуғучилар билән хитай оқуғучилар арисида миллий тоқунуш йүз бәргән.