Рабийә ханим голландийә сәпирини ахирлаштуруп, америкиға қайтип кәлди

Дуня уйғур қурултийи рәиси рабийә қадир ханим түнүгүн кәч голландийә сәпирини ахирлаштуруп, америкиға қайтип кәлди. Голландийә сәпири рабийә ханимниң бу йил киргәндин буян явропа әллиридә елип барған 3 ‏- қетимлиқ зияритидур.
Мухбиримиз әркин
2010.04.02

Рабийә ханимниң мухбиримизға әскәртишичә, у бу қетимқи сәпиридә голландийә парламенти вә һөкүмитидики сиясәтчи һәм әмәлдарлар билән көрүшүп, "5 ‏- июл вәқәси"дин кейин голландийигә қечип чиққан уйғур мусапириға панаһлиқ бериш мәсилисини мәркәзлик оттуриға қойған.

Игилишимизгә қариғанда, "5 ‏- июл вәқәси"дин кейин чәтәлгә қечип чиқип, голландийә һөкүмитидин панаһлиқ тәләп қилған уйғурларниң сани 100 дин ашқан болуп, лекин голландийә һөкүмити уларниң панаһлиқ илтимасиға һазирғичә иҗабий җаваб бәрмигән.

Рабийә ханимниң әскәртишичә, голландийә парламент әзалири уйғур мусапирлириға чоқум панаһлиқ беришкә вәдә бәрмигән, лекин бу мәсилә үстидә голландийә һөкүмити билән сөзлишип, қолидин келидиған тиришчанлиқини көрситидиғанлиқини билдүргән.

Рабийә ханим бу қетим голландийигә хәлқара кәчүрүм тәшкилатиниң тәклипигә бинаән аместирдамда өткүзүлгән хәлқара кишилик һоқуқ филим фестивалиға қатнишиш үчүн барған иди. У, бу җәрянда голландийә һөрийәт университети қатарлиқ икки алий билим юртида нутуқ сөзлигән.

Хитайниң аместирдамдики баш әлчиханиси бу университетларға бесим ишлитип, йиғинни бикар қилишни тәләп қилған болсиму, лекин йиғинни уюштурғучи түрк оқуғучилар уюшмисиниң чиң туруши астида хитайниң тәлипи рәт қилинған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.