Рабийә қадир ханимниң японийә зиярити хитайниң наразилиқини қозғиди
Мухбиримиз миһрибан
2009.10.20
2009.10.20
Рабийә қадир ханим бу қетимлиқ зияритидә асаслиқи, токйо, кансаи, кюшу қатарлиқ җайлардики университетларда 20 - өктәбирдин 2 - ноябирғичә болған арилиқта, 'йипәк йолидики әҗдәрһа билән елишиватқан уйғур аниси' темисида лексийә сөзлимәкчи. Бу қетимқи лексийә бериш паалийитигә кагошима хәлқара университети саһипханлиқ қилидикән.
Рабийә қадир ханим бу қетимқи японийә зиярити җәрянида, йәнә япончә нәшр қилинған китабиниму тонуштуридиған болуп, 30 - өктәбир күни японийә мухбирлириниң мәхсус зияритиниму қобул қилмақчи.
Рабийә қадир ханимниң японийә зияритигә нисбәтән, хитай ташқи ишлар министирлиқи баянатчиси ма чав дүшәнбә күни наразилиқ баянати берип, японийиниң хитайниң қаттиқ наразилиқиға қаримай, бу йил июл ейидин кейин йәнә бир қетим рабийә қадир ханимниң японийидә зиярәттә болуши учун виза бәргәнликигә наразилиқ билдүрди.
Рабийә қадир ханим японийигә келиштин бурунму, хитайларниң токйода турушлуқ әлчиханиси қадир ханим лексийә беридиған 10 университетқа бесим ишлитип, дуня уйғур қурултийиниң террорчи тәшкилат икәнликини, бу тәшкилатниң рәиси рабийә қадир ханимниң университетларда лексийә беришигә рухсәт бәрмәслики керәкликини ейтқан болсиму, университет мудирлири японийиниң демократик әркин дөләт икәнликини, буни тосушниң мумкин әмәсликини ейтип, хитайларниң тәлипини рәт қилған иди.