Рабийә қадир ханим хитай даирилирини хәлқниң бихәтәрликигә капаләтлик қилишқа чақирди

Уйғурларниң чәтәлдә сүргүндики рәһбири рабийә қадир ханим уйғур аптоном райони даирилирини аммиви бихәтәрликкә капаләтлик қилишқа, үрүмчидә йәнә тоқунуш йүз беришниң, қан төкүлүшниң алдини елишқа чақирди.
Мухбиримиз әркин
2009.09.04

Явропа сәпиридики рабийә қадир ханим пәйшәнбә күни брюсселда ахбарат елан қилиш йиғини чақирип, "мән хитай даирилирини шәрқий түркистандики пүтүн хәлқләрниң җумлидин уйғурлар вә хәнзуларниң бихәтәрликигә капаләтлик қилишқа чақиримән" дегән.

Рабийә қадир ханим бу сөзләрни пәйшәнбә күни үрүмчидә хитайларниң намайиши йүз берип, уйғурларға һуҗум қилиш вәқәси йүз бәргән, хитай һөкүмити 5 адәмниң өлгәнликини, 14 адәмниң яриланғанлиқини елан қилған бир вәзийәт астида тәкитлигән болуп, у йәнә "пакитлар шуни көрсәттики, хәнзуларниң намайиш қилип, өзиниң авазини ипадилишигә йол қойғанлиқи хитай һөкүмитиниң қош өлчәм қоллиниватқанлиқини көрситиду" дәп тәкитлигән.
 
Районда вәзийәтни тинҗитишниң алдинқи шәрти ваң лечүәнниң истипа бериши икәнликини тәкитлигән рабийә ханим йәнә " уйғурлар билән хәнзуларниң тинчлиқ ичидә биргә турушиниң алдинқи шәрти ваң лечүәнниң вәзиписидин истипа берип, уйғур хәлқиниң қанунлуқ тәләплирини шундақла хәнзуларниң еһтияҗини чүшинидиған мувапиқ әмәлдарларни тәйинләштур" дәйду.

Ваң лечүән, пәйшәнбә күни үрүмчидә намайиш қилған хитай намайишчиларға тәдбир қолланмиған, у пәқәт намайишчиларниң "өзини тутувелиши"ни тәләп қилған иди. Шинхуа агентлиқи хәвиридә, намайишчилар қошуни ичидә уйғурларниң барлиқини илгири сүргән. Лекин бу хәвәр йәрлик хәлқләрниң яки тәрәпсиз мәнбәләрниң испатлишиға еришәлмиди.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.