Рабийә қадир ханим японийидә қизғин алқишлар билән күтүвелинди

Японийә зиярити үчүн 27 - июл вашингитондин айрилған уйғур миллий һәрикити рәһбири рабийә қадир ханим һәмрийи билән, 28 - июл күни японийә пайтәхти токйодики нарита хәлқаралиқ айродромға оңушлуқ йетип кәлди.
Мухбиримиз гүлчеһрә
2009-07-28
Share

Бешиға яришимлиқ чимән доппа кийивалған рабийә ханим японийидә қоллириға шәрқий түркистан байриқи көтүрүвалған бир гуруппа уйғурлар һәм японлуқлар шундақла мухбирларниң қизғин қарши елишиға еришкән.

Бу рабийә қадир ханимниң иккинчи қетим японийидә зиярәттә болуши, бу қетим рабийә қадир ханим японийидә бәш күнлүк паалийәт пилан қилған болуп японийидики уйғурларға мәдәт беришни мәқсәт қилған паалийәтләрдин башқа йәнә, уйғур мәсилиси һәққидә мәхсус муһакимә йиғиниға қатнишиду шундақла японийә либерал демократлар партийиси рәһбәрлири билән сөһбәтлишиду.

Рабийә қадир ханимниң бу зиярити хитайни биарам қилған болуп, түнүгүн хитай ташқи ишлар баянатчиси чиң гаң, хитай һөкүмитиниң японийиниң рабийә қадирға японийидә зиярәттә болушқа йол қойғанлиқиға қаттиқ нарази икәнликини билдүргән иди.

Хитайчә нур гезитиниң хәвиригә қариғанда, 27 - июл японийә ташқи ишлар баянатчиси хитайниң наразилиқиға инкас қайтуруп," рабийә ханимниң японға қаратқан зиярити японийә ‏ - хитай мунасивәтлиригә һечқандақ әкс тәсир әкәлмәслики керәк" дегән.

Бәзи хәвәр мәнбәлиригә қариғанда, японийә даирилири рабийә ханимниң зиярәт җәрянида бирәр қәст яки хәтәргә учрап қелишиниң алдини елиш үчүн рабийә ханимниң өткәнки қетимлиқ зияритигә охшаш бихәтәрлик тәдбирлири алған.

Рабийә ханим алдинқи қетим японийигә зиярәт үчүн барғинида,хитайниң рабийә қадир ханимни нишан қилип бир уйғур аял җасус орунлаштурғанлиқи, җасусниң иқрари арқилиқ дуняға паш болған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт