Русийә мутәхәссиси маслов : йеқинқи йилларда оттура асияда 8 милйон хитай пәйда болиду

Оттура асия ториниң нәқил кәлтүрүшичә, русийә федератсийиси алий иқтисад тәтқиқат университети шәрқшунаслиқ бөлүминиң башлиқи, профессор алексей маслов башқуруштики тәвәккүллүк мәсилилиригә аит 8 - қетимлиқ хәлқаралиқ муһакимә йиғинда мәхсус хитайниң оттура асиядики кәлгүси тәрәққияти вә көпийиши мәсилиси һәққидә тохталғанда мәзкур пәрәзни оттуриға қойған.

Хәвәрдә көрситилишичә, профессор маслов һазир хитайниң оттура асияни өзиниң иқтисадий мәнпәәт даирисигә киргүзгәнликини көрситиш билән биргә хитайниң оттура асияға кеңийишидә уйғур елини миссал алған.

Униң қарашлири мундақ йиғинчақлаш мумкин: хитайниң ғәрбий шималий сияси пилани шинҗаң уйғур аптоном райондики хитай аһалисиниң көпийиши билән мунасивәтлик, йеқинқи йилларда бу йәрдики хитайларниң сани наһайити тез көпәйди, һазир бу йәрдә 30 милйон нопус бар, пат арида бу нопус 100 милйон адәмгә йетиши мумкин. Униң ақивити нопусниң чәтәлгә еқиш болиду. Шуңа пәрәз қилишқа болидуки йеқинқи йиллар ичидә мәркизий асияда шинҗаң уйғур аптоном районидин келидиған 8 милйон хитай пәйда болиду.

Мәзкур русийә мутәхәссисиниң бу пәризи һәққидә оттура асия торида һәр хил инкаслар пәйда болған. Буниңсизму хитайниң оттура асиядики күнсайин ешиватқан тәсири һәққидә оттура асия мәтбуатлирида түрлүк сәлбий инкасларниң пәйда болуватқанлиқи мәлум.