رۇسىيە پرېزىدېنتى ۋلادىمىر پۇتىن بىلەن تاجىكىستان پرېزىدېنتى ئېمام ئەلى راخمان ئاخىرىدا بىرلەشمە بايانات ئېلان قىلغان بولۇپ، رۇسىيىنىڭ 201 - موتورلاشقان دىۋىزىيىسى يەنە 30 يىل تاجىكىستان چېگرىلىرىنى قوغدايدىكەن. ئەسلىدە ئىككى دۆلەت ئارىسىدىكى كېلىشىم بويىچە رۇسىيە 2014 - يىلى قوشۇن چېكىندۈرۈشى كېرەك ئىدى.
بۇنىڭدىن ئىلگىرى ۋلادىمىر پۇتىن قىرغىز پرېزىدېنتى ئالماسبېك ئاتانبايېۋ بىلەن رۇسىيىنىڭ قىرغىزىستاندىكى ھەربىي بازىسىنى 30 يىل ئۇزارتىش ھەققىدە كېلىشىم ھاسىل قىلغان ئىدى. بۇ كېلىشىملار ئارقىلىق رۇسىيە ھەربىي قوشۇنلىرى تاجىكىستان بىلەن قىرغىزىستاندا يەنە 30 يىل قالىدىكەن.
تاجىكىستان بىلەن رۇسىيىنىڭ ھەربىي كېلىشىمىگە تاجىكىستان مۇداپىئە مىنىستىرى شېرالى خايرۇللايېۋ بىلەن رۇسىيە مۇداپىئە مىنىستىرى ئانوتولىي سېردىيۇكوۋ ئىمزا قويغان. كېلىشىم بويىچە رۇسىيە ئارمىيىسى تاجىكىستاندا 2042 - يىلىغىچە تۇرىدۇ.
