Rusiye bilen xitay tebi'iy gaz sodisida kélishelmidi

Lékin ikki terep gaz bahasi qatarliq bir qatar mesililerde kélishelmey axirqi kélishimge imza qoyalmighan. Bu heqtiki xewerlerde her ikki terepning pat arida kélishim hasil qilish mumkinchilikidin ümidsiz ikenliki bildürülmekte. Rusiye bilen xitay buningdin ikki yil burun sébiriyidin xitaygha turuba yoli arqiliq ikki liniye boyiche gaz yötkeshke prinsip jehettin kélishken.

Mezkur gaz turubisining bir liniyisi rusiyining altay jumhuriyiti arqiliq Uyghur élining altay wilayiti we jungghar oymanliqidin ötetti. Altayning qanas qatarliq tebi'iy menzirilik rayonliridin ötidighan mezkur turuba yoli muhit qoghdighuchilirining qarshi turushigha uchrighan.
 Bügünki xewerlerde, xitay dölet re'isi xu jintaw bilen rusiye bash ministiri wladimir putinning peyshenbe küni mexsus söhbet élip barghanliqi, lékin ikki terepning kélishim hasil qilalmighanliqi bildürülgen.

Analizchilar, xitaygha tutushidighan gherbiy we sherqiy sébiriye gaz turuba yolining pütüp chiqishigha zor meblegh kétidighanliqini, 100 milyard dollar meblegh sélishqa toghra kélidighanliqini eskertip, mezkur turuba yoli arqiliq her yili xitaygha yollinidighan gaz miqdari, rusiye yilliq ichki ishlepchiqirish daramitining 2% ni teshkil qilidighanliqini bildürmekte. Xitay bilen rusiye 2009‏-yili kélishim tüzüp, rusiyidin her yili 70 milyard küp métir gaz yollashqa kélishken.