Rusiye xitaygha ilghar hujumchi ayropilan téxnikisi bermeydighanliqini jakarlidi

Yéqinda xitay özining “ J-20” tipliq 5-ewlad ilghar hujumchi ayropilanini sinaq qilghandin kéyin, gherb metbu'atlirida xitayning mezkur hujumchi ayropilan téxnikisining rusiye teripidin teminlen'genliki heqqidiki perezler meydan'gha chiqqan idi.
Muxbirimiz ümidwar
2011.08.28

Buninggha seweb bolghan amil xitayning mezkur hujumchi ayropilanining shekli we bezi iqtidarining rusiyining “Mig1.44” tipliq hujumchi ayroplanigha oxshighanliqi idi.

Rusiyining “Wzgilyad” gézitining analiz qilishiche rusiyining “Mig” küreshchi ayropilanlirini yasash we pilanlash shirkiti resmiy bayanat élan qilip, rusiyining xitaygha ilghar herbiy ayropilan téxnikisini bermigenlikini bildürdi.

“Mig” shirkitining bayanatchisi yéléna fédorowa rusiyining héchqachan xitayning “ J-20” tipliq ilghar küreshchi ayropilani yasash téxnikisigha yardem bermigenliki hemde héchqachan mundaq téxnikilarni xitaygha bermeydighanliqini tekitlidi.

“Wzglyad” gézitining analizchisimu rusiyining xitaygha her qandaq ilghar awi'atsiye téxnikisini bérishi mumkin emesliki, chünki hazir rusiye bilen xitayning dunya qoral-yaraq baziri biwasite riqabetchilerge aylan'ghanliqi, mundaq shara'itta rusiyining özining qoral-yaraq mexpiyitini xitaygha bérishi mumkin emeslikini tekitlidi.

Bir qisim rusiye herbiy istratégiye analizchiliri izchil türde xitayning rusiyidin su-27 qatarliq ilghar küreshchi ayropilanlarni sétiwélip, öz armiyisini qoralladuriwatqanliqi hetta téxnikilarni özleshtürüsh bilen shughulliniwatqanliqini, shunga mumkin qeder xitaygha mundaq ilghar qorallarni sétip bermeslikni teshebbus qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.