Uyghur rayon da'iriliri alahide saqchi qisimlirining hoquq da'irisini kéngeyitti

Tengritagh xewerler toridin ashkarilinishiche, aptonom rayonluq jama'et xewpsizlik nazariti bundin kéyin alahide bir weziyet bolmighanning sirtida, alahide saqchi qisimlirigha biwaste qomandanliq qilishning ornigha peqet uni teshkillep, omumiy jehettin bashquridiken. Yerlikte qurulghan alahide saqchi bash etriti bolsa birer weqe yüz bergende öz aldigha qarar chiqirish hoquqigha ige bolidiken. Bu qétimliq tengsheshte asasiy küch ürümchi shehirige qaritilghan bolup, aptonom rayonluq jama'et xepsizlik nazariti tarmiqidiki 1000 neper alahide saqchi peyshenbe küni murasim bilen ürümchi sheherlik jama'et xepszlik idarisining biwaste bashqurushigha ötküzüp bérilgen.

Ürümchi sheherlik partkomning sékritari ju xeylun murasimda qilghan sözide buning sewebini, ürümchi shehirining muqimliq asasining yenila ajiz bolushi we weziyetning yenila jiddiyliki, dep körsetken. U bu qétim ürümchi shehirige ötküzüp bérilgen alahide saqchi qisimlirining tuyuqsiz weqelerge waqtida zerbe bérip, térrorluqqa qarshi turush iqtidarini ashurup, muqimliqqa qattiq kapaletlik qilishini telep qilghan.

Uyghur éli weziyitini közetküchiler bolsa, yuqiridiki ehwalni xitay hökümitining Uyghur élide basturush we sotsiz höküm qilmishlirining salmiqini téximu ashuridighanliqining bishariti, dep körsetmekte. Ilgiri kishilik hoquq organliri xitay hökümitining térrorluqqa qarshi turushni bahane qilip turup, Uyghurlarni qalaymiqan basturuwatqanliqini, adil sot tertipisiz höküm ijra qiliwatqanliqini köp qétim doklat qilip, xitay hökümitini tenqid qilghan idi.