Сәнменшя су амбири көчмәнлири мәсилиси һәққидә китаб язған язғучи қолға елинған

Америка авазиниң хәвәр қилишичә, хитайдики сәнменшя су амбири көчмәнлириниң сәргүзәштилиригә даир китаб язған язғучи шйе чавпиң қолға елинған.
Мухбиримиз ирадә
2010.09.02

Хәвәрдин мәлум болушичә, илгири мухбирлиқ билән шуғулланған шйе чавпиң 2006 - йили мухибр болуп шәншиниң вейнән райониға берип, сәнменшя су амбири қурулуши сәвәбидин көчүрүветилгән кишиләрниң мәсилиси үстидә тәкшүрүш елип барған вә бу һәқтә көпләп мақалә елан қилған. Әмма униң мақалилири йәрлик сақчи даирилири тәрипидин йиғивелинған икән.

Әмма, шийе чавпиң бу кишиләрниң әһвалини ашкарилаштин йәнила баш тартмай, сәнменшя су амбири қурулушиниң зийиниға учриған кишиләрниң әһвалини баян қилған китаби "чоң көчүш" ни йезип чиқип, уни бу йил 5 - айда елан қилған.

Униң аяли америка авазиниң мухбириға мундақ дегән: "у сәнменшядин көчүрүветилгән кишиләрниң қандақ қейин әһвалда қалғанлиқини, немә паҗиәләргә йолуққанлиқини биләтти. Бу кишиләр униңдин өзлири йолуққан паҗиәләрни ашкарилашни, кейинки әвладларниң буни билип қелиши керәкликини тәләп қилған иди."

Игилинишичә, китабта йәрлик даириләрниң чириклики, көчүрүлгән аһалиләр учриған паҗиәләр вә йәр давасиға даир нурғун мәсилиләр ашкариланған болуп, китаб елан қилинип, иккинчи күнила шәнши даирилири тәрипидин йиғивелинған. язғучи болса 8 - айниң 19 - күни бейҗиңдики өйидин шәншилик сақчилар тәрипидин тутуп кетилгән. язғучиниң аилә тавабатиға болса униң немә үчүн қолға елинғанлиқи һәққидә һечқандақ мәлумат берилмигән.

Көзәткүчиләр язғучи шйе чавпиңниң қолға елиниш вәқәсиниң хитайдики пикир әркинлики мәсилисини йорутуп беридиғанлиқини билдүрмәктә. Шйе чавпиңниң адвокати җу зе бейҗиңда яшайдиған бир кишиниң шәнши даирилири тәрипидин қолға елиниши вә униң һечқандақ сәвәб көрситилмәй туруп 24 саәттин артуқ тутуп турулушиниң хитайниң өз қанунлириғиму хилап икәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.