Уйғур елидә аз дегәндә 20 миңдин артуқ нарәсидә балиниң сәргәрданлиқта һаят кәчүрүватқанлиқи ашкариланмақта

Мәзкур хәвәрдә билдүрүлүшичә, уйғур аптоном районлуқ хәлқ ишлар назарити, бу йил 20-апрелдин 17-июнғичә, хитай өлкилиридин җәмий 144 нәпәр уйғур сәргәрдан балини қайтуруп әкәлгән. Буниң билән, йеқинқи йиллардин бери хитай өлкилиридин қайтуруп келингән сәргәрдан нарәсидә балилар 3858 адәм қетимға, уйғур елиниң һәрқайси вилайәтлиридә қутқузувелинған сәргәрдан нарәсидә балилар 17838 адәм-қетимға йәткән. Хәвәрдә билдүрүлүшичә, сәргәрдан балиларни қутқузуш һәрикити йәнә давамлашмақта.

Юқириқи санлиқ мәлуматлар вә қутқузушниң давамлишиватқанлиқидин, нөвәттә уйғур җәмийитидә аз дегәндә 20 миң уйғур нарәсидә балиниң сәргәрданлиқта һаят кәчүрүватқанлиқи мәлум.

Гәрчә хәвәрдә һөкүмәт органлириниң нарәсидә балиларни хитай өлкилиридин қайтуруп әкелиши вә уйғур елидикилирини топлаш һәрикити нарәсидә балиларни қутқузуш дәп тәрипләнгән болсиму, әмма муһаҗирәттики уйғур паалийәтчилири буниң һәқиқий мәнидики бир қутқузуш икәнликигә гуман билән қаримақта.

Дуня уйғур қурултийиниң баянатчиси дилшат ришит бүгүн бу һәқтә пикир баян қилип, хитай һөкүмитиниң бу ишта, пәқәт өзлириниң дөләт образи вә җәмийәт аманлиқини көздә тутуватқанлиқини әскәртти.

Дилшат ришит уйғур елидә сәргәрдан балиларниң бу дәриҗидә көп болушиниң сәвәбини уйғурларниң нөвәттики сиясий, иқтисади вә иҗтимаий орни билән биваситә мунасивәтлик дәп әскәртти.