Шаңхәй һәмкарлиқ тәшкилати баш министирлар йиғини ечилди

Русийә учур агентлиқиниң хәвәр қилишичә, бу қетимқи йиғинға қирғизистан һөкүмити саһибханлиқ қилған болуп, йиғин риясәтчиликини қирғизистан баш министири җантөрә сатибалдийеф атқурди. 5 - Декабир пәқәт бир күн ечилған мәзкур йиғинда алди билән қазақистан баш министири серик әхмәтоф сөз қилғандин кейин, хитай баш министири вен җябав сөз қилип, шаңхәй һәмкарлиқ тәшкилатиға әза дөләтләрниң иқтисадий һәмкарлиқларни кеңәйтиш, йәрлик банкилар арисидики һәмкарлиқларни кеңәйтиш шуниңдәк тәрәққият банкиси қуруш қатарлиқ тәшәббусларни оттуриға қойди.

Пәрғанә учур ториниң йезишичә, йиғинда һәр қайси әза дөләтләрниң баш министирлири өзлири диққәт қилған вә яки өз дөләтлири еһтияҗ һес қилған нуқтидин пикир баян қилған болуп, русийә баш министири дмитрий медведев хитай баш министири билән охшимайдиған нуқтидин чиқиш қилип пикир баян қилған һәмдә хәвпсизликни қоғдашни алаһидә тәкитлигән.

Йиғин хуласиси сүпитидә әза дөләтләр баш министирлири шаңхәй һәмкарлиқ тәшкилатиниң 2013 - йиллиқ хамчотини имзалиди һәмдә шаңхәй һәмкарлиқ тәшкилатиниң бирләшмә тәрәққият фонди билән тәрәққият банкисини қуруш һәққидики қарарға имза қойди.