خەلقئارا جامائەتمۇ، قەشقەر شەھەر كوچىلىرىنىڭ بۇزۇلۇشىنى بىر مەدەنىيەتنىڭ بۇزغۇنچىلىققا ئۇچرىشى دەپ قارىغان، بەزى گۇرۇپپىلار " قەشقەرنى قوغداپ قالايلى" ناملىق ئاممىۋىي ھەرىكەت باشلاپ، خىتاي ھۆكۈمىتىنى بۇزغۇنچىلىقتىن توسۇشقا تىرىشقان.
شىنجاڭ خەۋەر تورىدىن مەلۇم بولۇشىچە، خىتاينىڭ ئۇيغۇر رايونلۇق ھۆكۈمىتى 8 - ئىيۇل كۈنى يىغىن ئېچىپ، مەزكۇر بۇزغۇنچىلىق قىلمىشىغا يېڭى ئىسىم قويغان. يەنى " شىنجاڭنىڭ يېڭى شەكىلدىكى شەھەر قۇرۇلۇشىنى تەرەققىي قىلدۇرۇش لايىھىسى " نى ئوتتۇرىغا قويغان. رايونلۇق ھۆكۈمەت پىلان كومىتېتى بۇ لايىھىنى ئەمەلىيلەشتۈرۈش ئۈچۈن، كومىتېتقا خادىم كوپەيتىدىغانلىقىنى ئېلان قىلغان. يىغىندا نۇر بەكرى سۆز قىلىپ، مەزكۇر لايىھىنى يېڭى دەۋەرگە ۋە تەرەققىياتقا ماسلىشىش دەپ مەدھىيىلىگەن. ۋە بۇ لايىھىنى ئەمەلىيلەشتۈرۈش ئۈچۈن كىشىلەرنىڭ يېڭى ئاڭغا ساھىپ بولۇشى كېرەكلىكىنى بىلدۈرگەن. نۇر بەكرى ئۇيغۇر رايونىدا قوش تىل مائارىپىنىڭ ئەمەلىيلىشىشىدە ئەڭ ئاكتىپ رول ئېلىپ كەلگەن. ئەمدىلىكتە، شەھەرلەرنىڭ مىللىي قىياپىتىنىڭ بۇزۇلۇشىدىمۇ باشلامچىلىقتا ئالدىدا ماڭىدىغانلىقى مەلۇم بولماقتا.