Хитайда елан қилинған “мухбирларниң шәхсий блогини башқуруш түзүми” наразилиқ қозғиди

Өткән һәптә хитай хәвәр вә нәшрият органлирини башқуруш идариси уқтуруш чиқирип, “мухбирларниң шәхсий блогини башқуруш түзүми” йолға қоюлидиғанлиқи һәмдә җайларниң мәхсус гуруппа тәшкилләп, уқтурушни әмәлийләштүрүшни тәләп қилиши хитайдики аммиви тор бекәтлиридә наразилиқ инкаслирини көпәйтти.
Мухбиримиз меһрибан
2012.12.12

Аммиви тор бекәтлиридики бир наразилиқ инкасида “һөкүмәт ахбарат васитилиридә һәр хил чәклимиләр сәвәбидин раст гәп қилалмиған мухбирларниң, 18-қурултайдин кейин өзиниң шәхсий блогидиму сөзләш әркинликиниң чәклиниши әҗәба хитайдики интернет торини пак-пакизә қиливетәрму?” дегән баянлар берилгән. Хитайдики “яңчең кечилик гезити” хәвәр бөлүминиң мәсули ваң гәнлин радиомиз хитай бөлүминиң зияритини қобул қилип, “биз 18-қурултайдин кейин хәвәрләргә қаритилған башқурушта юмшаш болушини үмид қилған идуқ, әмма бу уқтуруш, мухбирларниң әркинликиниң техиму чәклинидиғанлиқини көрсәтмәктә” деди.

Хитайдики аммиви тор бекәтлиридики инкасларда йәнә хитай әмәлдарлиридики парихорлуқ, чириклик қилмишлириниң мухбирларниң шәхсий блоглирида ашкариливетилиши хитай һөкүмитини биарам қилғанлиқи илгири сүрүлүп, йеңи бир әвлад хитай рәһбәрлик гуруһиниң өз образини қоғдаш үчүн барлиқ тәдбирләрни ишқа селиватқанлиқи илгири сүрүлди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.