شىمالى كورىيىنىڭ سۈنئىي ھەمراھ قويۇپ بېرىشى 28 دۆلەتنىڭ نارازىلىقىغا ئۇچرىدى

12-دېكابىر چارشەنبە كۈنى كورىيە ۋاقتى ئەتىگەن سائەت 9 دىن 49 مىنۇت ئۆتكەندە شىمالى كورىيىنىڭ «سامان يولى 3-نومۇرلۇق» دەپ نام بېرىلگەن سۈنئىي ھەمراھنى قويۇپ بېرىشى كورىيە يېرىم ئارىلى ۋەزىيىتىدىن ئەنسىرەۋاتقان دۆلەتلەرنى نارازى قىلدى.
مۇخبىرىمىز مېھرىبان
2012.12.12

بۇ شىمالىي كورىيىنىڭ 2006-يىلدىن بۇيان 5-قېتىم سۈنئىي ھەمراھ قويۇپ بېرىشى بولۇپ، ئالدىنقى 4 قېتىملىقى مەغلۇپ بولغان ئىدى. گەرچە 5-قېتىملىق سۈنئىي ھەمراھ قويۇپ بېرىش مۇۋەپپەقىيەتلىك ئېلىپ بېرىلغان بولسىمۇ، ئەمما شىمالى كورىيىنىڭ سۈنئىي ھەمراھ قويۇپ بېرىش ۋە باشقۇرۇلىدىغان بومبىنى قويۇپ بېرىش تېخنىكىسىنى ئىگىلىشى جەنۇبىي كورىيە ھەم كورىيە يېرىم ئارىلىنىڭ تىنچلىقىدىن ئەنسىرەۋاتقان ئەتراپتىكى قوشنا دۆلەتلەرنى ۋە غەرب دېموكراتىك دۆلەتلىرىنى بىئارام قىلغانلىقى خەۋەر قىلىندى.

جەنۇبىي كورىيە ھۆكۈمىتى بولسا، شىمالىي كورىيىنى سۈنئىي ھەمراھ قويۇپ بېرىش نامى بىلەن ئەمەلىيەتتە ئۇزاق مۇساپىلىك باشقۇرۇلىدىغان بومبا قويۇپ بەردى دەپ ئەيىبلىگەن.

خەلقئارا ئاخبارات ۋاسىتىلىرىنىڭ بۈگۈنكى خەۋەرلىرىدىن مەلۇم بولۇشىچە،12-دېكابىر كۈنىنىڭ ئۆزىدە 28 دۆلەت شىمالىي كورىيىنىڭ سۈنئىي ھەمراھ قويۇپ بېرىشىگە قارىتا كۈچلۈك ئىنكاس قايتۇرغان. شىمالىي كورىيىنىڭ قوشنىسى ياپونىيە بىرلەشكەن دۆلەتلەر تەشكىلاتىدا يىغىن چاقىرىپ، شىمالىي كورىيىگە ئېمبارگو قويۇشنى مۇزاكىرە قىلىشنى تەلەپ قىلغان. ياپونىيە تەرەپمۇ شىمالىي كورىيىنى سۈنئىي ھەمراھ نامى ئاستىدا باشقۇرۇلىدىغان بومبا قويۇپ بەردى دەپ ئەيىبلىدى.
شىمالىي كورىيە مەسىلىسىدە ئۈزلۈكسىز ھالدا سوغۇققان بولۇشنى تەشەببۇس قىلىپ كېلىۋاتقان خىتايمۇ شىمالىي كورىيىنىڭ سۈنئىي ھەمراھ قويۇپ بەرگەنلىكىدىن ئەپسۇسلىنىدىغانلىقىنى بىلدۈرگەن.

ﻣﯘﻧﺎﺳﯩﯟﻩﺗﻠﯩﻚ ﺧﻪﯞﻩﺭﻟﻪﺭ
قىسقا خەۋەرلەر
پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.