Шималий корийә: “әхмәқ сиясәтчиләр вә җәнубий корийә қорчақлири биздин өзгиришни күтмисун”

Шималий корийә бүгүн дуняға шималий корийиниң дөләт түзүминиң өзгәрмәйдиғанлиқини җакарлиди.
Мухбиримиз ирадә
2011.12.30

Шималий корийә дөләт телевизийиси арқилиқ елан қилинған баянатта мундақ дейилгән: “биз наһайити толуқ ишәнч вә кәскинлик билән шуни җакарлаймизки, дунядики әхмәқ сиясәтчиләр вә җәнубий корийиниң қорчақлири бизни өзгириду, дәп һәргиз үмид күтмисун.”

Баянатта йәнә, җәнубий корийиниң ким җуңелниң өлүмигә тәзийә билдүрүш үчүн икки ғәйрий рәсмий вәкил әвәтиши “кәчүргүсиз бир қилмиш” дәп әйибләнгән вә шималий корийиниң җәнубий корийә лидири ли мюң бак билән һәргиз алақә қилмайдиғанлиқи әскәртилгән.

Шималий корийиниң сабиқ лидири ким җуңел 17-декабир күни йүрәк кесили билән өлгәндин кейин, орниға кичик оғли 29 яшлиқ ким суңил варислиқ қилип, дөләт вә армийиниң рәһбәрлик вәзиписини тапшурувалди.

Дуня дөләтлири һазир ядро күчигә игә болған бу йеңи яш рәһбәрниң қандақ бир сиясәт йүргүзидиғанлиқини диққәт билән көзитиватқан иди. Безиләр һәтта ким җуңелниң өлүми билән шималий корийиниң диктатор һакимийәтниң аяқлишишини үмид қилишқан. Әмма шималий корийиниң бүгүнки баянати, бу үмидләрни йоққа чиқарған болди.

Бирләшмә агентлиқиниң хәвәр қилишичә, һазир америка ким җуңелниң өлүмидин кейинки бу йеңи вәзийәтни музакирә қилиш үчүн дипломатик паалийәтлирини башливәткән болуп, келәр һәптә америкиниң җәнубий асия вә тинч окян ишлириға мәсул әмәлдари курт кәмпел бейҗиң, сеул вә токйоларда зиярәттә болидикән. Бу ким җуңелниң өлүмидин кейин районда зиярәттә болидиған әң юқири дәриҗилик әмәлдар болуп һесаблиниду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.