Shimaliy koriye: "Exmeq siyasetchiler we jenubiy koriye qorchaqliri bizdin özgirishni kütmisun"

Shimaliy koriye bügün dunyagha shimaliy koriyining dölet tüzümining özgermeydighanliqini jakarlidi.
Muxbirimiz irade
2011-12-30
Share

Shimaliy koriye dölet téléwiziyisi arqiliq élan qilin'ghan bayanatta mundaq déyilgen: "Biz nahayiti toluq ishench we keskinlik bilen shuni jakarlaymizki, dunyadiki exmeq siyasetchiler we jenubiy koriyining qorchaqliri bizni özgiridu, dep hergiz ümid kütmisun."

Bayanatta yene, jenubiy koriyining kim jung'élning ölümige teziye bildürüsh üchün ikki gheyriy resmiy wekil ewetishi "Kechürgüsiz bir qilmish" dep eyiblen'gen we shimaliy koriyining jenubiy koriye lidiri li myung bak bilen hergiz alaqe qilmaydighanliqi eskertilgen.

Shimaliy koriyining sabiq lidiri kim jung'él 17-dékabir küni yürek késili bilen ölgendin kéyin, ornigha kichik oghli 29 yashliq kim sung'il warisliq qilip, dölet we armiyining rehberlik wezipisini tapshuruwaldi.

Dunya döletliri hazir yadro küchige ige bolghan bu yéngi yash rehberning qandaq bir siyaset yürgüzidighanliqini diqqet bilen közitiwatqan idi. Béziler hetta kim jung'élning ölümi bilen shimaliy koriyining diktator hakimiyetning ayaqlishishini ümid qilishqan. Emma shimaliy koriyining bügünki bayanati, bu ümidlerni yoqqa chiqarghan boldi.

Birleshme agéntliqining xewer qilishiche, hazir amérika kim jung'élning ölümidin kéyinki bu yéngi weziyetni muzakire qilish üchün diplomatik pa'aliyetlirini bashliwetken bolup, kéler hepte amérikining jenubiy asiya we tinch okyan ishlirigha mes'ul emeldari kurt kempél béyjing, sé'ul we tokyolarda ziyarette bolidiken. Bu kim jung'élning ölümidin kéyin rayonda ziyarette bolidighan eng yuqiri derijilik emeldar bolup hésablinidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet